Премьер-министр Олжас Бектенов Құрылтай сайлауынан кейін жаңартылған құрамда Үкіметтің алғашқы отырысын өткізді, - деп хабарлайды Massaget.kz тілшісі.
"Қазақстан Республикасының Үкіметі туралы" конституциялық заңға сәйкес Үкіметтің жаңа мүшесі - төтенше жағдайлар министрі Мұрат Мұханов ант берді.
"Жаңа Конституция заңды күшіне еніп, мемлекетіміз саяси және экономикалық жаңғыруға қадам басқан тарихи кезеңде еліміздің одан әрі әлеуметтік-экономикалық дамуын қамтамасыз ету үшін бәріміз жан-жақты шара қабылдауға міндеттіміз. Барлық бағыт пен сала бойынша Мемлекет басшысы қойған міндеттерді жүйелі әрі кешенді түрде жүзеге асыру қажет", - деді ол.
Олжас Бектеновтің сөзінше, "Заң мен Тәртіп" және "Таза Қазақстан" конституциялық қағидаттары әрдайым биік тұруға тиіс.
"Үкіметтің жұмысы кешенді шараларды қабылдай отырып, озық қарқынмен жүруі керек. Қазір - толық жауапкершілік алып, нақты нәтижелерге қол жеткізу үшін қажет шешімдерді жедел қабылдайтын уақыт. Бәріміз Президенттің сенімін толық ақтауымыз керек", - деді Үкімет басшысы.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова