Қазақстандықтарға 100 мың теңгеден беріліп жатқаны туралы ақпарат тарады
![Қазақстандықтарға 100 мың теңгеден беріліп жатқаны туралы ақпарат тарады](/userdata/news/news_98557/image_l.jpg)
WhatsApp-та "Қазақстан азаматтарына 100 мың теңгеден бастап төленетіні" туралы ақпарат тарап жатыр, - деп хабарлайды Massaget.kz тілшісі stopfake.kz-ке сілтеме жасап.
Тіпті сол тараған ақпаратта Қаржы министрлігінің жалған сайтының сілтемесі де ұсынылады екен. Алайда бұл ақпарат - алаяқтардың ісі. Ресми дереккөздерде және БАҚ-та мұндай ақпарат жоқ.
ҚР Қаржы министрлігінің баспасөз қызметі де тараған ақпаратты жоққа шығарды. Хабарламада көрсетілген мәліметтер шындыққа жанаспайды, ал тіркелген сілтеме ҚР Қаржы министрлігінің атынан ашылған жалған сайтқа апарады. Ведомство өкілдері барлық ресми ақпарат Қаржы министрлігінің ресми порталында орналастырылатынын мәлімдеді.
"Ақшаңыздан айырылып қалмау үшін күмән тудыратын сілтемелерге өтпеңіз. Тек ресми және сенімді ақпарат көздеріне сеніңіз", - деп жазылған басылым мәліметінде.
Еске салайық, бұған дейін де дәл осындай жалған ақпараттар тарады. Әлеуметтік желілерде қазақстандықтарға 100 мың теңге және одан артық мөлшерде өтемақы төленетіні айтылды. Алайда ол кезде де бұл жалған ақпарат болып шықты.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова