Әнші Ильхан Ихсановтың "Бір айда" әні түрік тіліне аударылды. Ол алдағы уақытта да түрікше тректер шығаратынын айтты, - деп хабарлайды Massaget.kz тілшісі.
Әнші бұл туралы Revue News бағдарламасында мәлімдеді.
"Мен түрік сериалдарының үлкен фанатымын. Түріктердің туындыларын көп қараймын. "Бір айда" әнін о баста түрік тіліне аударып шығаруды жоспарладым. Бұл ән Қазақстанда ғана емес, бауырлас Түркияда да танымал болады деп күтеміз", - деді әнші.
Өнер иесі мұнымен тоқтап қалмай, келесі тректерін де түрік тілінде жазуды жоспарлап отырғанын айтты. Осылайша, аудиториясын кеңейткісі келетінін жасырмады.
"Менің мақсатым - түріктерді қазақша ән тыңдауға шақыру. Қазір Садраддин әніне түрікше сөздер қосып шығарды. Соның өзінде қазақша ән тыңдайтын түріктердің қатары көбейді. Менің де ойымда осы нәрсе бар", - дейді әнші.
Еске салайық, Ильхан Ихсанов сұхбатында Садраддинмен дуэт орындағаннан кейін ешкіммен бірігіп ән жазбайтыны туралы айтқан болатын.
Қызықты жаңалықтар мен видеоларды көру үшін TikTok арнамызға жазылыңыз!
Д. Ибраева