Қазақстандағы су тасқыны: ТЖМ өңірлердегі жағдай туралы айтты
![Қазақстандағы су тасқыны: ТЖМ өңірлердегі жағдай туралы айтты](/userdata/news/news_106914/image_l.png)
Төтенше жағдайлар министрлігі Қазақстандағы су тасқыны жағдайы туралы мәлімдеді, - деп хабарлайды Massaget.kz тілшісі.
Тәулік ішінде Петропавл қаласы мен Солтүстік Қазақстан облысының Қызылжар ауданында 174 тұрғын үйден мотопомпалар мен жылжымалы сорғы станциялары арқылы су шығарылып, шығарылды. Барлығы 137 627 текше метр су сорылды. Есіл өзеніндегі су деңгейін бақылау жұмыстары жүргізілуде. Ұлттық ұлан әскерилері тұрғындарға көшелер мен аулаларды абаттандыру мен тазалауға көмектесуде.
"Ақтөбе облысы Ырғыз ауданы Құйлыс және Жайсаңбай ауылдарында жағалауды бекіту жұмыстары жалғасуда. Бір тәулікте 3050 қап пен 233 тонна инертті материалдар төселді. Облыстағы жағдай тұрақталып келеді. Республика бойынша 10 013 тұрғын үй мен 3 215 аула аумақтарынан 17 миллион текше метр еріген су бұрылып, 51 111 адам уақытша орналастыру орталықтарында қалды", - деп хабарлады Төтенше жағдайлар министрлігі.
Солтүстік Қазақстан облысының Петропавл қаласында Төтенше жағдайлар министрлігінің радиациялық, химиялық және биологиялық қорғаныс бөлімшелері екі күн ішінде су басқан 326 үйді, ал Атырау облысының Құлсары қаласында 76 500 шаршы метр аумақты залалсыздандырды.
Қорғаныс министрлігінің әскери қызметкерлері Батыс Қазақстан облысы Теректі ауданы Подстепное және Аңқаты ауылында жалпы көлемі 71 гектарды құрайтын су басқан аумақтарда осындай жұмыстарды жүргізді.
Бұған дейін Су шаруашылығы және ирригация министрлігі Қазақстанның екі облысында су тасқынының екінші толқыны жалғасып жатқанын хабарлаған болатын.
Аптаның басты оқиғалары мен пайдалы видеоларды көру үшін YouTube арнамызға жазылыңыз
А. Жайыққызы