Барлық үміткерлер жоғары білімі, 5 жылдан кем емес басшылық лауазымда жұмыс өтілінің болуы, сондай-ақ, ЖОО дамыту бағдарламасының болуы жағынан қойылып отырған талаптарға сәйкес келетінін атап өткен жөн. Сапалық құрамы жағынан байқауға білім және ғылым жүйесінің 26 өкілі қатысты (16 ғылым докторы, 8 ғылым кандидаты).
Үміткерлермен сұхбат және олар ұсынған ЖОО дамыту бағдарламасын талқылау нәтижесінде Республикалық конкурстық комиссия Қарағанды мемлекеттік техникалық университетінің ректоры бос лауазымына тағайындауға Марат Ибатовты, І. Жансүгіров атындағы Жетісу мемлекеттік университетінің ректоры лауазымына Қуат Баймырзаевты және Павлодар мемлекеттік педагогикалық институтының ректоры бос лауазымына Алтынбек Нұхұлын тағайындауды ұсынды.
Еске сала кетейік, ағымдағы жылдан бастап Қазақстанда мемлекеттік ЖОО-ның ректорларын тағайындау ережесі өзгерді. Енді жаңа талаптарға сәйкес ректорлардың тағайындалуы ашық конкурс негізінде жүргізіледі. Бұған дейін мемлекеттік жоғары оқу орындарының ректорлары ҚР Білім және ғылым министрінің жеке шешімімен тағайындалып келді. Сондықтан, ректорлар корпусының біраз бөлігі аталған лауазымда 3 жыл сайын екі мерзімнен аса уақыт иеленіп келді. Бұған дейін хабарланғандай, бұл жаңашылдық қазақстандық жоғары оқу орындарының басқару құрамын сапалы толтыру және басқару дербестігін ұлғайту, сондай-ақ, қоғам алдындағы есептілікті күшейту қажеттігінен туындап отыр.
Биыл қазан айында ЖОО-ның бақылаушы кеңестерінің отырыстары өткізілді, онда үміткерлер ұсынған оқу орнын дамыту бағдарламалары қаралды. Оның қорытындысында ЖОО-ның бақылаушы кеңестері құпия дауыс беру арқылы Республикалық комиссия қарауына ұсыну үшін кандидаттарды анықтады.