Қазақстанда тұрғын үй аулаларында жаңа жол белгілері пайда болады

Қазақстанда тұрғын үй аулаларында жаңа жол белгілері пайда болады
Фото: depositphotos.com

Қазақстанда тұрғын үй кешендерінің аулаларында өртсөндірушілер мен басқа да арнайы қызмет көліктеріне арналған орындар белгіленеді. Ол жерлерге қызыл және ақ түсті жол таңбалары салынып, көлік тоқтатуға тыйым салатын белгілер орнатылады. Бұл төтенше жағдай кезінде құтқарушылардың тұрғын үйлерге кедергісіз жетуі үшін қажет, - деп хабарлайды Massaget.kz тілшісі.

Төтенше жағдайлар министрі Мұрат Мұхановтың айтуынша, тиісті бұйрық 21 қарашада күшіне енді. Жаңа талаптар қазір салынып жатқан тұрғын үй кешендеріне қатысты.

Дегенмен министрлік бұрыннан пайдалануға берілген үйлердің аулаларында да осындай арнайы орындар белгілеуді жоспарлап отыр. Соның бірі Астанадағы "Гранд Алатау" тұрғын үй кешенінің ауласында жасалған.

"Мүлік иелері бірлестігі біздің ұсынысымызды қолдап, өрт сөндіру техникасына арнайы орын бөліп берді. Бұл жұмысты басқа тұрғын үйлерде де жалғастырамыз", – деді Мұханов журналистерге.

Арнайы техникаға арналған алаңға көлікпен кірген жүргізушілерге 5 АЕК, яғни 2026 жылы 21 625 теңге айыппұл салынады. Егер жүргізуші бір жыл ішінде осы ережені қайта бұзса, айыппұл екі есе өсіп, 10 АЕК немесе 43 250 теңге болады.

Еске салайық, 12 сәуірге қараған түні Астананың Түркістан көшесіндегі 21 қабатты тұрғын үйдің 15-қабатында өрт шыққан еді. Пәтерден үш баланың мәйіті табылды.

Өртсөндірушілер бір әйелді аман алып шығып, ауруханаға жеткізді. Оның денесін күйік шалған. Сондай-ақ, жоғарғы қабаттардан 20 адам эвакуацияланып, тағы 40-қа жуық тұрғын ғимараттан өз бетімен шыққан. Оқиғаға байланысты соталды тергеу басталды.

Сол кезде Астана қалалық Төтенше жағдайлар департаменті құтқарушылардың тұрғын үй ауласына кіруі қиын болғанын хабарлаған. Өйткені аулаға кіретін жол темір қақпамен жабылып, айналасына көліктер қойылған.

Өртсөндірушілердің жолын бөгеген көлік иесіне кейін айыппұл салынды.

Қызықты жаңалықтар мен видеоларды көру үшін TikTok арнамызға жазылыңыз!

Massaget.kz
Logotype Massaget