Қазақстанда тағы 2 жол учаскесі ақылы болады

"ҚазАвтоЖол" мәліметінше, 22 ақпаннан бастап Қазақстандағы екі жол учаскесі ақылы болады, - деп хабарлайды Massaget.kz тілшісі.

Қазақстан Республикасы Көлік министрінің міндетін атқарушы 2025 жылғы 7 ақпанда қол қойған №39 және №40 бұйрықтарға сәйкес Қостанай - Ресей Федерациясының шекарасы (Троицк) және Ақтөбе - Ресей Федерациясының шекарасы (Орынбор) бағытындағы тасжол учаскелері жүк көліктері мен автобустар үшін ақылы болмақ.

Қостанай - Ресей Федерациясының шекарасы (Троицк) тасжолы

Жаңа ақылы учаскенің ұзындығы - 163 шақырым, 539-шақырымнан 376-шақырымға дейін (М-36). Жүргізушілер балама бағыт ретінде Қостанай - Рудный - Әйет - Ресей Федерациясының шекарасы және Ресей Федерациясы (Екатеринбург) - Алматы жолдарын пайдалана алады.

Ақтөбе - Ресей Федерациясының шекарасы (Орынбор) тасжолы

Ақылы учаске 17-шақырымнан 99+692 шақырымға дейінгі бөлікті (82,7 шақырым) қамтиды. Бұл учаскені айналып өту үшін Ақтөбе-Ресей Федерациясының шекарасы (Орск) бағыты бойынша жүруге болады.

Төлем автоматты режимде жүзеге асырылады, шлагбаумдар мен стационарлық бекеттер болмайды. Аркада орнатылған камералар көлік қозғалысын, жылдамдықты тіркейді.

Төлеудің 10-ға жуық әдісі қарастырылған: интернет банкинг, терминалдар, электрон әмияндар, телефон балансы, жанармай карталары (E100), сондай-ақ, заңды тұлғалар үшін келісімшарттар. Алдын ала төлем жасаған жағдайда жол жүру құны төмен болады.

Ақтөбе-Ресей Федерациясының шекарасы (Орынбор) тасжолы бойынша төлем мөлшері:

• 16 орынға дейінгі автобустар, 2,5 тоннаға дейінгі жүк көліктері: 515 теңге (алдын ала төлем), 600 теңге (кейінгі төлем);
• 32 орынға дейінгі автобустар, 5,5 тоннаға дейінгі жүк көліктері: 1040-1220 теңге;
• 32 орыннан жоғары автобустар, 10 тоннаға дейінгі жүк көліктері: 1545-1820 теңге;
• 10-15 тонна жүк көліктері: 2080-2440 теңге;
• 15 тоннадан жоғары, тіркемелері бар жүк көліктері, седельді тартқыштар: 2580-3040 теңге.

Қостанай-Ресей Федерациясының шекарасы (Троицк) тасжолы бойынша төлем мөлшері:

• 16 орынға дейінгі автобустар, 2,5 тоннаға дейінгі жүк көліктері: 1010-1190 теңге;
• 32 орынға дейінгі автобустар, 5,5 тоннаға дейінгі жүк көліктері: 2055-2415 теңге;
• 32 орыннан жоғары автобустар, 10 тоннаға дейінгі жүк көліктері: 3065-3610 теңге;
• 10-15 тонна жүк көліктері: 4100-4825 теңге;
• 15 тоннадан жоғары, тіркемелері бар жүк көліктері, седельді тартқыштар: 5120-6030 теңге.

Қызықты жаңалықтар мен видеоларды көру үшін TikTok арнамызға жазылыңыз!