Қазақстанда өмірде бар, құжатта жоқ ауылдар бар болып шықты

Абай облысында есепте жоқ адамдар, тіпті тұтас бірнеше ауыл бар, - деп хабарлайды Massaget.kz тілшісі "Хабар 24" телеарнасына сілтеме жасап.

Кіші Ақтөбе, Мұрат кенті мен Жарқын ауылының халқы қазір қай ауданға қарайтынын білмейді. Құжаттарын әзірлеу үшін Озерки ауылына барса, Жаңа Семей ауданына жөнелтеді. Ал ондағылар тұрғындарды кері қайтарады. Енді жұрт әрі-сәрі күйде қалып отыр. Семейден 15 шақырым жерде отырса да базыналарын кімге айтарын білмеген жұрт жергілікті биліктен көмек сұрайды.

Кіші Ақтөбе кентінің өмірде бар, бірақ құжатта жоқ екенін тұрғындар былтыр маусымда білген. Наталья Белозерова үйін сатылымға шығарған. Сатып алушымен келісім жасау үшін ХҚКО-ға барып құжат рәсімдемек болыпты. Сол кезде ауылының ешқайда тіркелмегені белгілі болады. Тұрғындар жеті ай бойы жауаптыларға шағымданғанымен еш нәтиже шықпаған. 

Серік Молдақановтың Кіші Ақтөбе кентінде тұрғанына 10 жылға жуықтаған. Оның айтуынша, бұрын кент Озерки ауылдық округіне қараған. Осы жазда тұрғындардың еш жерде тіркелмегені анықталыпты. Жарты жылдан бері талай табалдырықты тоздырғандарымен мардымды жауап ала алмаған. 

Шамамен бір жыл бұрын Жаңа Семей ауданы құрылып, Озерки ауылдық округі жаңа ауданның құрамына кірді. Бірақ оған қарайтын Кіші Ақтөбе, Мұрат және Жарқын ауылдары тіркелмей қалған. "Азаматтарға арналған үкімет" мемлекеттік корпорациясы Абай облыстық филиалы қалалық сәулет және қала құрылысы бөліміне хат жолдаған. Енді жауаптылар тиісті жұмысты жүргіземіз деп отыр. 

"Хат келіп түсті. Біз жауап береміз. Әрі қарай Азаматтарға арналған үкімет өз құзыреті шегінде базаны өзгертуге тиісті шаралар қолданады", - деді сәулет және қала құрылысы бөлімі басшысының міндетін атқарушы Ерлан Мекетаев.

Телеарна мәліметінше, қала әкімдігі бұл мәселеден бейхабар. Семей қаласының бас жоспарына сәйкес үш ауыл да Семей қаласына қарасты болып шықты. Енді құжаттарды рәсімдеу үшін жергілікті әкімдік пен ХҚКО-ы бірлесіп жұмыс жүргізбек. Бірақ жауаптылар оның қанша уақытқа созылатынын дөп басып айта алмады.

Instagram парақшамызға жазылып, ең қызықты ақпараттарды бірінші болып оқыңыз!