Қазақстанда есірткінің жеңіл түрі заңдастырылуы мүмкін бе?

Бүгін Қырғызстанда марихуананы заңдастырылуы мүмкін екені белгілі болды. Қырғызстандық депутаттың пікірінше, бұл жастарды қауіпті синтетикалық есірткіден қорғауға көмектеседі. Қазақстан мұндай жаңашылдық енгізуі мүмкін бе? Ішкі істер министрінің орынбасары Санжар Әділов жауап берді, - деп хабарлайды Massaget.kz тілшісі.

Санжар Әділов Сенат кулуарында мұндай мәселе қазіргі уақытта күн тәртібінде жоқ екенін айтты.

"Бүгінгі таңда есірткі өндірушілерге қатысты жауапкершілікті күшейту және есірткі таратушыларға қатысты жазаны жеңілдету туралы шешім қабылданды. Басқа есірткі түрлеріне, жауапкершілікті төмендетуге немесе олардың қандай да бір жинақтаушы кестеде өзгеруіне байланысты мәселелер қарастырылмайды. Басқа елдердің тәжірибесі бізде зерттеліп жатыр. Кешенді жоспарды іске асыру бойынша ведомствоаралық жұмыс тобы жұмыс істеп жатыр", - деп түсіндірді ІІМ орынбасары.

Журналистер кешенді жоспар аясында жеңіл есірткілерді заңдастыру мәселесі қарала ма деп сұрады.

"Біз ең алдымен қылмыстық жауапкершілікке тарту, осы қылмыстарға ықпал ететін себептер мен жағдайларды анықтау бойынша халықаралық елдердің тәжірибесін зерттеп жатырмыз. Халықаралық тәжірибені зерттеудің негізгі мақсаты - осы зұлымдыққа қарсы күреске үкіметтік емес ұйымдарды, жергілікті атқарушы органдарды және белсенді қоғам өкілдерін көбірек тарту үшін алдын алу шараларын ұйымдастыру", - деп жауап берді Санжар Әділов.

Еске салайық, бүгін қырғызстандық депутат елде есірткінің жеңіл түрін заңдастыруды ұсынған болатын.

"Жақсы мен жаманды ажырата білу керек. Мысалы, синтетикалық есірткі - жаман. Елде кәмелетке толған азаматтарға есірткінің жеңіл түрін пайдалануға рұқсат беруді қарастыру қажет", - дейді депутат. 

Депутат қарасора сияқты табиғи есірткілерді құқық қорғау органдары жойып жіберетінін, олардың қымбаттап кеткенін, сондықтан жастар синтетикалық есірткіні арзан сатып алатынын айтты. Басқа депутаттар есірткіні заңдастыру туризмді дамытуға көмектесетінін атап өтті.

Сонымен қатар бүгін Сенат отырысында есірткі сақтаушыларға қатысты жаза мерзімін 5-10 жылдан 5-8 жылға дейін қысқарту ұсынылды. Сенатор Нұрлан Бекназаров депутаттардың есірткі бизнесін ұйымдастырушыларға жауапкершілікті күшейтіп, бас бостандығынан айыру мерзімдерін өмір бойына ұзартуды ұсынатынын мәлімдеді. 

Заң жобасында есірткі саудасымен айналысатындар мен курьерлерге қатысты жауапкершілікті дифференциациялау ұсынылады. Есірткі сақтаушыларға қатысты жаза мерзімдері төмендетіліп, сәйкесінше:

• 5–8 жыл (бұрын 5-10 жыл)
• 6–10 жыл (бұрын 6-12 жыл)
• 7–12 жыл (бұрын 10-15 жыл) болып белгіленген.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!