"Қазақстан темір жолы" Ұлттық компаниясы" АҚ еншілес ұйымына монополияға қарсы заңнаманы бұзғаны үшін айыппұл салынды, - деп хабарлайды Massaget.kz тілшісі Бәсекелестікті қорғау және дамыту агенттігіне сілтеме жасап.
Астана бойынша Бәсекелестікті қорғау және дамыту агенттігі департаменті "KTZ EXPRES" АҚ-ға қатысты тергеп-тексеру жүргізді, тексеріс барысында 2021 жылы әскери тасымалдау аясында көлік-экспедиторлық қызметтерге жоғары баға белгіленгені анықталған.
Тергеп-тексеру барысында акционерлік қоғам Қазақстанда белгілеген экспедиторлық комиссиялардың тасымалдау құнының 30 пайызына жетіп, рұқсат етілген нормалардан асып кеткені анықталыпты.
"Әкімшілік құқықбұзушылық жөніндегі мамандандырылған ауданаралық сотта істі қарау қорытындысы бойынша компанияның 10 114 304, 84 теңге мөлшерінде монополиялық табысы тәркіленіп, 853 379,7 теңге мөлшерінде айыппұл тағайындалды. Сот қаулысы заңды күшіне енді", - деп жазылған хабарламада.
Тексеріс Бас көлік прокуратурасымен бірлесіп жүргізілген.
Instagram парақшамызға жазылып, ең қызықты ақпараттарды бірінші болып оқыңыз!
Ж. Қадыржанова