Желіде әскерде қызмет етіп жүрген араб жігітінің видеосы тарады. Massaget.kz тілшісі видео кейіпкерін тауып, сұхбаттасты.
Бұл видео TikTok-та 1 миллионға жуық қаралым жинаған. Қолданушылар жігіттің қазақша сөйлегеніне тәнті болды.
Massaget.kz тілшісі видеодағы Абдалла Салих Сами Эль-Томмен сұхбаттасты. Ол Өскемендегі Қасым Қайсенов атындағы №27943 әскери бөлімінде қызмет етіп жүр.
"Мен Алматыда дүниеге келдім. Балалық шағымды Судан мен Сауд Арабиясында өткіздім. 2-сыныпқа дейін сонда тұрып, кейін Қазақстанға көшіп келдім. Ұлтым - араб. Метиспін: анам - қазақ, әкем - араб", - дейді ол.
Абдалла Салихтің айтуынша, әскерде қызмет етуге әжесі септігін тигізген.
"Әскерге келмей тұрып әжеммен әскер жайлы көп әңгімелесетінбіз. Сол кездері әскер туралы көзқарасым мен ойым көпшілікпен бірдей еді: 90-жылдар, әлімжеттік көрсету, өлім мен ұрып-соғу. Әжеммен әңгімеден кейін әскерге барамын деп шешім қабылдадым. Неге десеңіз, мұнда тәртіп мықты, өзіңді қадағалауың, тәрбиелеуің және физикалық шынығуың керек", - дейді кейіпкер.
Абдалла Салих әскерде зениттік дивизионының қамтамасыз ету взводында наубайшы-жүргізуші мамандығын меңгерген. Қазір осы қызметті атқарып жүр. Оның айтуынша, әскери өмір қызық, бірақ өзінің қиындықтары да бар.
Желі қолданушыларын тәнті еткені - кейіпкердің қазақ тілінде таза әрі сауатты сөйлегені.
"Не деген сауатты жігіт", "Қазақша таза сөйлегенің үшін рақмет, үлгі болар жігіт", "Қазақ тілінде емін-еркін сөйлеп тұр", "Қазақша сөйлеп тұрғанына риза болып тұрмын", "Жаны қазақ қой", - деп жазған олар.
Абдалла Салих қазақ тілін қашан және қалай меңгергенін айтып берді.
"Қазақ тілін Қазақстанға көшіп келген кезде мектепке түсу үшін үйрендім. Алғашында тіл айырмашылығы мен сөйлеу жағынан қиындықтар болды, әрине. Бірақ жалпы алғанда екі тіл бір-біріне ұқсас болған соң, аз уақытта үйреніп, сөйлеп кеттім", - дейді ол.
Кейіпкер әскерден кейін әкесінің туыстарына Сауд Арабиясына барып келу жоспарда барын айтты.
@shygys.aqparat Өскемендегі Қ.Қайсенов атындағы №27943 әскери бөлімінде арабтың баласы Алаштың жерін қорғап жүр.
♬ оригинальный звук - SHYGYS AQPARAT
Еске салайық, бұған дейін қорғаныс министрінің бірінші орынбасары Сұлтан Камелединов әскердегі әлімжеттікке қатысты сұраққа жауап берген еді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!