Америкалық Эван Аллен 8 ай бұрын Қазақстанға Fulbright бағдарламасымен келген. Ол бұдан 3 жыл бұрын қазақ тілінің дыбысталуын ұнатып, Ninety Оne әндері арқылы тілді үйрене бастаған. Кеше Эван Аллен топ мүшелерімен кездесіп, арманын орындады. Massaget.kz тілшісі америкалық жігітпен Тараздағы өмірі, тілді қалай меңгергені және қазақ әндеріне деген қызығушылығы туралы сұхбаттасты.
Америкалық Эван Аллен 24 жаста. Оның қазақша есімі - Айқын. Ол Нью-Йорк штатындағы Рочестер қаласында дүниеге келген. Эван бұдан 3 жыл бұрын қазақ тілін үйреніп бастаған, ал былтыр күзде елімізге Fulbright бағдарламасы арқылы келіп, Тараз университетінде ағылшын тілінен сабақ бере бастады. Америкалық жігіттің айтуынша, оған тіл меңгеруге Ninety Оne тобының әндері әсер еткен.
"Өзімді сынап көргім келді"
Эван мектепті аяқтаған соң Нью-Йорктегі университетке халықаралық қатынастар және француз тілі мамандығына түскен. Ол оқуымен қатар қазақ тілін үйрене бастаған. Америкалық жігіттің айтуынша, алдымен 2 жыл тілді өздігінен меңгерсе, тек кейінгі бір жылда мұғалімнен сабақ алып жүр.
"Қазақ тілін 3 жыл бұрын оқып бастадым. Одан соң Висконсен университетінде қазақ мұғалімінен 8 ай сабақ алған едім. Жаңа нәрсе үйренуге құштарлығым бар. Қазақ тілінің дыбысталуы өте әдемі, маған ұнайды. Француз, испан тілін үйреніп алған соң, өзімді сынап көргім келді де, қазақ тілін үйренуге шешім қабылдадым", - дейді жігіт.
Эванның айтуынша, ән тыңдап тіл үйренген әлдеқайда оңай. Сондықтан ол Желіде қазақ тіліндегі поп әндерді іздеуге кіріскен. Сол кезде оны Ninety Оne әндері қызықтырған.
"Мен ән тыңдағанды ұнатамын. Сондықтан YouTube-тa қазақ поп әндерін іздедім. Ең алғаш КешYou-ді тыңдадым. "Ризамын", "Қазақ қыздары" әндері ұнады. Кейін алғаш рет Ninety Оne-ның "Мен емес", "Бәрі біледі" әндерін тыңдап көрдім. Маған биті (әннің ырғағы - еск.) ұнады. Кейін Ninety Оne Space-терді (арнайы шығарылым - еск.) қарай бастадым. Желіде қазақ контенті көп емес, сол үшін бұл дәл маған керек нәрсе болды. Алғашқы видеоларында кейде орысша сөйлеп қалатын, сондықтан маған субтитр қажет еді", - дейді ол.
Эван кеше Ninety Оne тобының мүшелерімен кездесіп, арманын орындады. Топ мүшелері америкалық жігіттің тілге деген қызығушылығына алғыс айтып, оған сый тартты.
"Тамырсыз орман болмайды" деген тіркес жаныма батты
Америкалық жігіт Ninety Оne-нан басқа Alpha, Мархаба Сәби, Орынханды тыңдайды, ал дәстүрлі әндерден тек "Балқадишаны" ғана біледі. Ол әндердегі өзіне қатты ұнайтын тіркесін бөлісті.
"Маған топтың Ирина Қайратовнамен бірге жазған "Табу" әні ұнайды, одан басқа "Ойнамай қой", "Қайтадан" әндерін сүйіп тыңдаймын. "Табу" әнінде "тамырсыз орман болмайды" деген тіркес жаныма батты, оның мағынасы терең", - дейді Эван.
Эванның айтуынша, алғашында оған кирилл әліппесін оқу қиын болған. Ол тек латынша жазылған сөздерді түсінетін еді. Бірақ Қазақстанға келіп, көзі үйреніп кеткен. Қазір ол латынға қарағанда кирилмен оқу оңай екенін айтты.
"Мен орыс тілін мүлде түсінбеймін"
Америкалық жігіт бағдарлама бойынша неге Таразға жіберілгенін түсіндірді.
"Елшілікте бізге алдын ала ерекшеліктерімізге сәйкес қала таңдап қояды. Мен орыс тілін мүлде түсінбейтіндіктен, мені Таразға жіберді. Ал басқа орыс тілін түсінетіндерді Қазақстанның солтүстік қалаларына жіберді. Барлығы 15 адам келдік", - дейді америкалық жігіт.
Эван Тараздағы өмірі туралы айтып берді. Оның айтуынша, жақында әкесі мен қарындасы Қазақстанға келеді, сол кезде ол Тараздағы көрікті жерлерді көрсетеді.
"Тараз - өте жасыл, таза әрі тыныш қала. Онда көне ғимарат көп, мысалы, Айша бибі, Тектұрмас кесенелері. Менің таныстарым келсе, міндетті түрде сол жерлерге апарамын. Адам да көп емес, Нью-Йорк секілді емес. Таразда Тектұрмас қатты ұнайды, себебі сол жерден қала алақандағыдай көрінеді. Оның маңында этно саябақ та бар", - дейді ол.
Эванның айтуынша, Таразда дос тауып, адамдармен араласып кету қиынға соқпаған. Бұл бағдарлама бойынша бір жыл бұрын келген жігіт Эванды жақын араласқан достармен таныстырған. Қазір ол қазақ тілінен беретін мұғаліммен дос екенін, онымен бірге караокеге жиі баратынын айтты.
Бұдан басқа, америкалық Айқын қазақтар мен АҚШ тұрғындарының арасында айырмашылық туралы бөлісті.
"Адамдар АҚШ пен Қазақстан тұрғындарының арасында айырмашылық көп деп ойлайды, бірақ негізінен олай емес, көп ұқсастық бар. Айтарлықтай мәдени шок алмадым. Бір қызығы, Нью-Йоркпен ауа райы ұқсас, бірақ адамдар 10 градус болса, бірден "тоңбадың ба" деп таңғалатын. Таразда шетелдік көп емес, сондықтан мен бір жерге барғанда менімен суретке түседі. Ол негізінен жаман нәрсе емес, бірақ кейде өзімді ыңғайсыз сезінетінмін", - дейді ол.
Эванға Қазақстанда ұнайтын тағы бір нәрсе - баға. Оның айтуынша, алғашқы күндері бағаның арзандығы басты айналдырып жібергені сонша, тіпті бәрін бірден сатып алуға кіріскен.
Эван 20 елде болған. Ал Қазақстан ішінде Астана, Тараз, Шымкент, Атырау, Қызылорда, Алматы тіпті Арал теңізін көрген. Ал осы айда ол Ақтауға сапарын жоспарлап отыр.
"Америкаға қайтқанда көп құрт алып кетерім анық"
"Маған қазақ тағамдары қатты ұнайды. Қарның қатты ашып тұрғанда тояды. Қатты ащы емес. Маған лағман ұнайды. Ет асқанда да ұнайды, бірақ мейрамханаға барып, арнайы етке тапсырыс беріп көрмедім. Сусындар арасында шұбатты жақсы көремін, Қызылордада алғаш рет шұбат ішіп көрдім. Сосын құрт ұнайды. Алғашында ұнамаған еді, кейін дәмі тіл үйретініне көзім жетті. Америкаға қайтқанда көп құрт алып кетерім анық", - дейді Эван.
Америкалық Айқын алдағы жоспарын бөлісті.
"Маусым аяғында бағдарлама аяқталған соң, еліме қайтамын. Нью-Йоркте экологиялық саясат бойынша жұмысқа орналасқым келеді. Мүмкін болса Қазақстанға тағы келгім келеді. Таразда балалар үйінде ерікті болып едім, сол балаларды тағы көргім келеді. Мен солардан "тістеме, ұрма" деген қазақ сөздерін үйрендім", - дейді ол.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!