Қарағандыда мектеп оқушысы сыныптасынан қомақты ақша бопсалаған
![Қарағандыда мектеп оқушысы сыныптасынан қомақты ақша бопсалаған](/userdata/news/news_94605/image_l.jpg)
Қарағандыда мектеп оқушысы сыныптасынан 350 мың теңге аударуды талап еткен, - деп хабарлайды Massaget.kz тілшісі ІІМ баспасөз қызметіне сілтеме жасап.
Полицияға 39 жастағы тұрғын шағымданды. Ол белгісіз біреу 14 жастағы ұлына 350 мың теңге ақша аударуды талап етіп, хат жолдағанын, ақша бермеген жағдайда ұлының атынан мектепте жарылғыш зат орнатылды деп хабарлама беретінін айтқан.
"Полиция қызметкерлері хатты жазған адамды анықтады. Оның арызданушының ұлының 15 жастағы сыныптасы екені анықталды. Мектеп оқушысы бұл хатты ойнап жазғанын айтты", - делінген хабарламада.
Қазір мектеп оқушысын есепке қою, ал ата-анасын жауапкершілікке тарту мәселесі қаралып жатыр.
Еске салайық, бұған дейін Қарағандыда науқас медбикенің телефоны арқылы жарылғыш зат туралы жалған ақпарат таратқаны хабарланды.
Қызықты жаңалықтар мен видеоларды көру үшін TikTok арнамызға жазылыңыз!
Ж. Қадыржанова