Қарағанды облысы Нұра ауданының 60 жастағы тұрғынын мас күйде мәслихат депутаты қарумен қорқытты, - деп хабарлайды Massaget.kz тілшісі.
Оқиға 21 қазан күні Ахметауылында болған. Жәбірленушінің қызының айтуынша, жанжал әкесінің жолда депутаттың көлігін айналып өтуінен басталған. Қыздың айтуынша, депутат әкесін қуып жетіп, оның басына қару тақаған. Бойжеткен оқиға туралы әлеуметтік желіде жазды.
Қарағанды облысы полиция департаменті баспасөз қызметі оқиғаға қатысты түсінік берді.
Ведомствоның мәліметінше, депутат ұсақ бұзақылық жасағаны үшін сот шешімімен 15 тәулікке қамауға алынған.
Полиция бұл іс бойынша "Қорқыту" және "Заңсыз атыс қаруын алып жүру" баптары бойынша сотқа дейінгі тергеу басталғанын хабарлады. Қазіргі уақытта жәбірленушінің барлық уәжі мұқият тексеріліп жатыр.
"Қылмыстық іс Қарағанды облысының полиция департаменті басшылығының бақылауында", - деп хабарлады.
Instagram парақшамызға жазылып, ең қызықты ақпараттарды бірінші болып оқыңыз!