Қаңтар оқиғасында кімдер мемлекеттік төңкеріс жасауға оқталғаны анықталды
![Қаңтар оқиғасында кімдер мемлекеттік төңкеріс жасауға оқталғаны анықталды](/userdata/news/news_76491/image_l.jpg)
Қаңтар оқиғасы кезінде мемлекеттік төңкеріс жасауға оқталу әрекеттері болды. Бұл туралы бас прокурор Берік Асылов Мәжілістің жалпы отырысында айтты, - деп хабарлайды Massaget.kz тілшісі.
Асылов мұның бәрі тергеу барысында зерттелгенін атап өтті.
"Әрине, мемлекеттік төңкеріс жасауға оқталу әрекеттері болды. Оны толығымен тергеу көрсетті. Қазіргі кезде барлық құжатты тексеріп, оны қарастырып жатырмыз. Төңкеріске оқталу алдын ала дайындалып, жоспарланған. Бір жыл бұрын дайындалу кезеңдері болған. Оның ішінде ҰҚТ мүшелері де, діни экстремистер де болды. Бұрын сотты болғандар да болды. ДВК (Қазақстанда экстремистік деп танылған - еск.) жақтаушылары да болды", - дейді Асылов.
Берік Асыловтың сөзінше, олардың әрекетінен 8 қалада мемлекеттік 71 ғимарат өртеніп бұзылған.
Еске салайық, былтырғы жаппай тәртіпсіздік газға байланысты мәселеден шыққан еді. 2 қаңтарда Жаңаөзенде жиналған жұрт сұйытылған газ бағасын төмендетуді талап етті. Кейін басқа қалалар да осы үнге қосыла бастады. Соның қатарында Алматы, Нұр-Сұлтан, Ақтөбе, Орал тұрғындары да болды. Осылайша, 4 қаңтарда Қазақстанның түкпір-түкпірінде наразылық акциялары өтті. Сондай-ақ, жаппай тәртіпсіздікке ұласқан оқиға салдарынан интернетте де ақау шықты.
Ал Бас прокуратурада Алматыда өткен жаппай тәртіпсіздік хронологиясын жасаған еді. Сол мәліметтерге сүйенсек, 4 қаңтарда сағат 18.00-ден 20.00-ге дейін "Алматы-Арена" спорт кешені мен "Халық-Арена" стадионы маңында жұрт жиналған. Сағат 21.00-де жиналған адамдар қала әкімдігіне қарай қозғала бастаған. Осылайша, олар Абай, Төле би көшелерімен жүріп келе жатып, адам қосып отырған. Тәртіпсіздікке қатысушылар 5 қаңтарда Әуезов ауданының Полиция басқармасының, Алмалы ауданының Полиция басқармасы мен бөлімінің әкімшілік ғимараттарын басып алуға тырысқан. Ал кешке қарулы шабуылшылар қаланың Полиция департаментінің ғимаратына шабуыл жасаған. Әкімдік пен Президент резиденциясына шабуыл кезінде қылмыскерлер атыс қаруын қолданудың қаупін түсінгенімен, ғимараттарға мақсатты түрде шабуыл жасаған.
Ал қаңтар оқиғасынан кейін тұрғындардың талабы орындалып, өңірлерде сұйытылған газ бағасы 50 теңгеге түсті. Сондай-ақ, Ұлттық қауіпсіздік комитетінің басшысы болған Кәрім Мәсімов пен оның орынбасарлары ұсталды. Өңірлерде әлі күнге қаңтар оқиғасына қатысты істер жүргізіліп жатыр. 2 қарашада Мемлекет басшысы Қасым-Жомарт Тоқаев қаңтар оқиғасына қатысушыларға бір реттік рақымшылық жасау туралы заңға қол қойған. Бұл бойынша 1500-ға жуық адамға рақымшылық жасалатыны белгілі болды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
С. Сатыбалдина