Жылқыны көлігімен басқан жүргізуші неге жазаланбайтыны белгілі болды

Полицияның мәліметінше, Алматы облысында көлігімен атты басқан жүргізушіге қатысты іс тараптардың татуласуымен аяқталған. Бұл туралы Massaget.kz өңірлік Полиция департаментіне сілтеме жасай отырып хабарлайды.

Ведомство өкілдері Іле ауданы Междуреченск ауылының 38 жастағы тұрғыны зардап шеккен жылқының иесіне келтірілген залалды толық өтегенін хабарлады. Күдіктіге қатысты іс тоқтатылады.

"Тараптардың татуласуына байланысты күдіктіге қатысты қылмыстық іс тоқтатылады. Ол жануардың иесіне келтірілген залалды толық өтеген. Енді жылқыны басқан автокөлік жүргізушісіне қатысты шағым жоқ", - деп хабарлады Алматы облысы ПД баспасөз қызметі өкілдері.

Еске салайық, Алматы облысында жылқыны қасақана басқан жүргізушінің видеосы Желіде қызу талқыланған еді. Күдіктіні полиция ұстаған. Құқық қорғау органдарының мәліметінше, Междуреченск ауылының 38 жастағы тұрғыны ауылдастарымен жанжал кезінде атты басқан. Ер адам өзінің әрекетін бақшасынан 20-ға жуық жайылып жүрген жылқыны шығаруға тырыстым деп түсіндіріпті.

Жануар аман қалған, бірақ иелері оны жарақаты болғандықтан, бауыздауға мәжбүр болған.