“Жомарт“ кенішіндегі төтенше жағдайдан кейін қылмыстық іс қозғалды

Ұлытау облысы Жаңаарқа ауданындағы "Жомарт" кенішінде шахта опырылып, жеті адам мерт болған оқиғадан кейін қылмыстық іс қозғалды, - деп хабарлайды Massaget.kz тілшісі.

Ресми хабарламаны аймақтың Полиция департаменті жариялады.

"Бұл дерекке қатысты ҚР Қылмыстық кодексінің 277-бабы, 3-бөлігі "Тау-кен немесе құрылыс жұмыстарын жүргізу кезінде қауіпсіздік ережелерін бұзу" бойынша қылмыстық іс қозғалды", - деп жазылған хабарламада.

Оқиға орнында департаменттің жедел-тергеу топтары жұмыс істеп жатыр.

"Қазір барлық қажет тергеу әрекеті жүргізіліп жатыр", - деп толықтырды ведомство өкілдері.

Оқиғаның мән-жайы

2025 жылы 17 ақпанда "Жомарт" кенішіндегі шахтада тау-кен массасы опырылды. Оқиға салдарынан шахтаның 7 қызметкері үйінді астында қалды. Кабельдер үзілуіне байланысты жұмысшылармен байланыс та жоғалды.

Авариялық-құтқару жұмыстарына Ұлытау және Қарағанды облыстарының ТЖД күштері мен құралдары, апаттар медицинасы орталығының қызметкерлері, ТЖМ психологтары жұмылдырылды. 

Премьер-министр Олжас Бектеновтің тапсырмасымен Ұлытау облысы Жаңаарқа ауданындағы шахтадағы төтенше жағдайдың себептерін тергеу және зардап шеккендерге көмектесу жөніндегі арнайы комиссия құрылды. Комиссияны премьер-министрдің орынбасары Қанат Бозымбаев басқарды.

2025 жылы 18 ақпанда ТЖМ жеті жұмысшы да өлі табылғанын, олардың жеке басын анықтау үшін сараптама жүргізілетінін хабарлады. 

"Жомарт" кеніші Жезқазған қаласынан оңтүстік-шығысқа қарай 130 шақырым жерде орналасқан. Онда мыс сульфиді өндіріледі. Ал "Қазақмыс" корпорациясының ірі акционері - Kazakhmys Copper.

Аптаның басты оқиғалары мен пайдалы видеоларды көру үшін YouTube арнамызға жазылыңыз