Алматыда автобус жүргізушісі қайтыс болды. Әлеуметтік желіде оқиғаның видеосы тарады, - деп хабарлайды Massaget.kz тілшісі.
"Алматыэлектротранс" ЖШС №92 автобуста болған төтенше жағдайға байланысты пікір білдірді.
"25 қаңтарда сағат 14:35-те диспетчерлік қызметке №92 автобус жүргізушісінің денсаулығы кенет нашарлағаны туралы хабарлама түсті. Оқиға Абай даңғылы мен Сайын көшесі қиылысында болды. Жолаушылардың бірі жедел әрекет етіп, жүргізушінің кабинасына кіріп, тежегішті басып, қауіптің алдын алды", - деп жазылған хабарламада.
Жолаушылар дереу жедел жәрдем шақырған. Оқиға орнына келген дәрігерлер жүргізуші қайтыс болғанын анықтаған. Алдын ала диагноз - миокард инфаркті.
"Оқиға орнына Әуезов ауданы жол полициясы басқармасының қызметкерлері келді. Автобусқа техникалық зақым келмеген, жолаушылар арасында зардап шеккендер жоқ", - деп жазылған хабарламада.
Қызықты жаңалықтар мен видеоларды көру үшін TikTok арнамызға жазылыңыз!