Жетісу облысында 100-ден аса тұрғынды алдаған топ ұсталды

Жетісу облысы прокуратурасының үйлестіруімен полиция интернационалдық алаяқтар тобының жолын кесті, - деп хабарлайды Massaget.kz тілшісі облыс прокуратурасына сілтеме жасап.  

4 адамнан тұратын топ шетелдіктермен бірлесе отырып, облыстың жүзден аса тұрғынын алдаған, олар 100 миллион теңгеден астам шығынға ұшыраған.

Қылмыстық ниеттеріне қол жеткізу үшін олар әртүрлі алдау схемалары мен заманауи технологияларды, яғни қашықтан қол жеткізу қолданбаларын (AnyDesk, Kenguru, Teamviewer) және т.б. пайдаланды.

Топтың өзінің "Қолма-қол ақша шешу орталығы" бар, ол дропперлерді пайдаланып, қаражатты криптовалютаға аударып отырған.

Олардың тұрғылықты жерін тінту кезінде 35 ұялы телефон, 3 жүйелік блок, 3 ноутбук, 2 пневматикалық тапанша және қымбат нөмірлері бар 3 люкс көлік тәркіленді.

Топтың 4 мүшесіне қатысты соталды тергеп-тексеру жүргізіліп жатыр.

Қылмыс жасағаны үшін күдіктілер мүлкін тәркілей отырып, 7 жылға дейін бас бостандығынан айыру түріндегі жазаға тартылуы мүмкін.

Жетісу облысы прокуратурасы азаматтарға алаяқтықтың құрбаны болмауды, басқа тұлғаларға жеке деректерді немесе банк шотының мәліметтерін беруден бас тартуы керектігін ескертеді.

Қызықты жаңалықтар мен видеоларды көру үшін TikTok арнамызға жазылыңыз!