Мемлекет басшысы Венесуэла президентінің міндетін атқарушы Делси Родригеске көңіл айту жеделхатын жолдады, - деп хабарлайды Massaget.kz тілшісі.
Қазақстан Президенті Қасым-Жомарт Тоқаев Венесуэладағы жойқын жер сілкінісі салдарынан көптеген адам қаза табуына және жарақат алуына байланысты Делси Родригеске көңіл айтты.
"Осындай ауыр кезеңде қайғы-қасіреттеріңізге ортақтасып, сізге, жақындарынан айырылған отбасыларға, сондай-ақ, достас Венесуэла халқына көңіл айтамын. Табиғи апаттан қайтыс болған жандардың туыстары сабырға келіп, болаттай берік болуын, ал жарақат алған азаматтар тез арада сауығып, отбасыларына аман-есен оралуын тілеймін", – деп жазылған жеделхатта.
Айта кетейік, Венесуэлада кейінгі жүз жылдағы ең жойқын жер сілкінісі болды. Қаза тапқандар саны 200-ге жуықтады, мыңдаған адам хабар-ошарсыз кеткендер тізімінде.
Магнитудасы 7,2 және 7,5 балл болатын екі жерасты дүмпуі сәрсенбіде кешке Венесуэла астанасының батысында тіркелді.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Ж. Қадыржанова