Жер сілкінісі туралы ескерту неліктен барлық алматылыққа келмеді?

Бүгін алматылықтардың ұялы телефонына жер сілкінісі туралы ескерту келді. Алайда хабарлама кейбір тұрғындарға келген жоқ, - деп хабарлайды Massaget.kz тілшісі.

Себебі бұған дейін алматылықтар мен қала қонақтары Mass Alert құлақтандыру жүйесі хабарламасын алу үшін iPhone құрылғыларын iOS 18 нұсқасына жаңартуы қажет екені ескертілген болатын. 

Алматылықтар мен қала қонақтарына алаңдаудың қажеті жоқ, себебі бұл жай ғана сынақтан өткізу. Енді бұл құлақтандыру iOS операциялық жүйесін пайдаланушыларға да қолжетімді. Айта кету керек, iPhone құрылғыларының иесіне iOS 18 бағдарламалық жасақтамасы болса ғана ескерту келеді.

Егер құрылғы автоматты түрде жаңармаса, оны "Баптаулар - Негізгі - Бағдарламалық жасақтаманы жаңарту" деп өзі жаңарту керек.

Мобильді құрылғы пайдаланушыларына "Ұлттық құлақтандыру" белгісімен сынақ туралы хабарлама жіберіледі, ал кейбір Android операциялық жүйесі бар құрылғыларға "Президенттік құлақтандыру" белгісімен ескерту түседі.

Естеріңізге сала кетейік, биыл 31 мамырда бірінші кезеңде Android операциялық жүйесі бар құрылғыларға сынақтан өткізу жүйесі жүргізілді. Бұрын хабарланғандай, екінші кезеңде iOS құрылғыларының пайдаланушылары электрондық құлақтандыру жүйесіне қосылады.

Instagram парақшамызға жазылып, ең қызықты ақпараттарды бірінші болып оқыңыз!