"Жасылға өтуге болмайды". Жаяу жүргіншілерге арналған жаңа ереже пайда болуы мүмкін

ІІМ жол қозғалысы ережелеріне енгізілуі мүмкін өзгерістерге қатысты пікір білдірді. Онда жаяу жүргіншілердің көшеден өтуін шектейтін норма қарастырылады, - деп хабарлайды Massaget.kz тілшісі.

2023 жылғы қарашаның аяғында "Ашық НҚА" сайтында жол қозғалысы ережелеріне түзетулер жобасы пайда болды. Ондағы бір тармақ жаяу жүргіншілерге арналған жолды бағдаршамның рұқсат беру сигналына кесіп өту ережелеріне қатысты.

Сарапшылардың айтуынша, егер ережелер қабылданса, онда жаяу жүргіншілерге қиылыстардағы жолды кесіп өту әлдеқайда қиын болады, өйткені олар бұрылыс маневрін аяқтап үлгермеген көліктерге жол беруге міндетті болады. Сарапшылар осыған байланысты кептелістердің саны ғана емес, сонымен қатар, апаттар да артуы мүмкін екенін атап өтті.

ІІМ "Жол жүрісі қағидаларын бекіту туралы "Қазақстан Республикасы ішкі істер министрінің 2023 жылғы 30 маусымдағы № 534 бұйрығына өзгерістер мен толықтырулар енгізу туралы" министр бұйрығының жобасы 3-тараудың 16-тармағына шынымен де түзетуді қамтитынын хабарлады: "Қозғалыс реттелетін жерлерде жаяу жүргіншілер реттеушінің немесе жаяу жүргіншілер бағдаршамының сигналдарын басшылыққа алады, ал олар болмаған кезде - көлік бағдаршамы, бағдаршамның немесе реттеушінің рұқсат беру сигналы кезінде жаяу жүргінші жол қиылысы арқылы ертерек басталған қозғалысты аяқтайтын көлік құралдарына жол береді".

"Бұл норма ең алдымен жаяу жүргіншілердің қауіпсіздігін қамтамасыз етуге арналған, өйткені қазір жаяу жүргіншілер көбінесе өз қауіпсіздігін елемейді және көлік құралдарының бұрын басталған маневрді аяқтағанына немесе жаяу жүргіншілер өткелінің алдында тоқтауға мүмкіндігі барына көз жеткізбей, бағдаршамның рұқсат беру сигналы бойынша жолға шығады", - деді министрлік өкілдері.

Ішкі істер министрлігі түзетулердің әлі қабылданбағанын, оларды қабылдау кезінде қоғамдық талқылау нәтижелері ескерілетінін баса айтты.

Өзекті жаңалықтарды өз уақытында оқу үшін Facebook парақшамызға жазылыңыз!