Жапония Қазақстан компаниясына санкция енгізді

Жапония Украинадағы соғысқа байланысты Ресейге қарсы қосымша санкциялар енгізуді мақұлдады. Бұл шектеулер Қазақстанның бір ұйымына да әсер етті, - деп хабарлайды Massaget.kz тілшісі Nikkei-ге сілтеме жасап. 

Бұл туралы Жапония министрлер кабинетінің отырысында белгілі болды. Экспортқа тыйым салынған тауарлар тізіміне кран қозғалтқыштарының бөлшектері мен басқа да арнайы жабдықтарға арналған бөлшектерді, сондай-ақ шағын мотоциклдерді қосатын 335 позиция енгізілді. Бұл тыйым Ресейдің өнеркәсіптік әлеуетін күшейтуі мүмкін.

Сонымен қатар химиялық қару жасау үшін пайдаланылуы мүмкін капсаицин сынды химиялық заттар да тыйым салынған заттар қатарына енгізілді. Бұл тауарлардың экспортына қойылған шектеу 23 қаңтарда күшіне енеді.

Үкімет шешімінде санкцияларды айналып өтуде Ресейге көмектеседі деп күдікке ілінген алты елдегі 31 ұйымға экспортқа тыйым салу да қарастырылған. Бұл елдер қатарында Қазақстан, Біріккен Араб Әмірліктері (БАӘ), Қытай, Қырғызстан, Таиланд және Түркия бар. Санкциялар енгізілген ұйымдардың атаулары есепте көрсетілмеген. Осыған байланысты Қазақстанның Индустрия және құрылыс министрлігінің баспасөз қызметіне қосымша ақпарат алу үшін сұрау салынды.

Сонымен бірге, Ресейдің 11 жеке тұлғасы, 29 ұйымы және 3 банкі активтерді бұғаттау тізіміне енгізілді. Бұған қоса, ресейлік емес бір жеке тұлғаның және бір банктің активтері бұғатталды.

Жапония министрлер кабинетінің бас хатшысы Есимаса Хаяши баспасөз мәслихатында Жапонияның Украина төңірегіндегі жағдайды реттеуге бағытталған халықаралық күш-жігерге үлес қосуды жалғастыратынын және жеті ірі экономика тобындағы (G7) елдермен бірлесе жұмыс істейтінін мәлімдеді.

Аптаның басты оқиғалары мен пайдалы видеоларды көру үшін YouTube арнамызға жазылыңыз