"Жаңалықты естіген бойда күйеуі ажырасып кеткен". 70 жастағы әйел егіз босанды

Угандада 70 жастағы әйел егіз босанды. Сафина Намуквая ЭКО әдісімен жүкті болып, өмірге егіз баланы аман-есен әкелген. Угандалық қыз бен ұлдың анасы атанған әйелге кесарь тілігі жасалған, - деп хабарлайды Massaget.kz тілшісі "Астана" телеарнасына сілтеме жасап. 

BBC News мәліметінше, Сафинаның өзі балалардың дүниеге келуін керемет деп атаған. Зейнеткер өзін жақсы сезінеді. Кампала қалалық ауруханасы 70 жастағы ананың егізді өмірге әкелуін тек медициналық жетістік қана деп санамайды. 

"Бұл адам рухының күші мен төзімділігі туралы әңгіме", - деп атап өтті дәрігерлер.

Намуквая Африканың ең қарт анасы атанды. Ол балаларды жалғыз өзі тәрбиелемек. Өйткені Сафина егіз туады деген жаңалықты естіген бойда, күйеуі ажырасып кеткен.

"Ер адамдар бірнеше баланың өмірге келетінін ұнатпайды. Мені осында қабылдағаннан бері ол ешқашан келген емес", - деді әйел.

Бұл - Намукваяның кейінгі үш жылда екінші рет босануы. 2020 жылы ол қыз туды. Сафина тұңғышы дүниеге келгенге дейін адамдар оның балаларының жоғынан мазақ еткенін айтты.

"Мен басқа адамдардың балаларын бақтым, олар ержетіп, мені жалғыз қалдырды. Мен қартайған кезде маған қамқорлық жасайтын ешкім болмайды деп ойладым", - деп түсіндірді ол ұрпақ әкелгісі келетіндігін.

Ақпаратқа сәйкес, Намуквая балаларын дүниеге әкелу үшін донорлық ұрықты немесе бұрын мұздатылған ұрықты пайдаланғаны белгісіз. Сондай-ақ, Сафина менопаузадан өткен, өтпегені де белгісіз. Ол әдетте 45 пен 55 жас аралығындағы әйелдерде кездеседі.

Бір қызығы, Намуквая әлемдегі ең қарт ана емес. 2019 жылы Үндістанда егіз қызды Мангаямма Ярамати есімді 73 жастағы әйел дүниеге әкелді. Ол да балаларға ЭКО арқылы жүкті болған.

Қызықты жаңалықтар мен видеоларды көру үшін TikTok арнамызға жазылыңыз!