Жақында Дильназ Ахмадиеваның алты жаңа релизі жарыққа шығады

ҚР Еңбек сіңірген қайраткері, танымал әнші Дильназ Ахмадиева алғашқы авторлық әнін жазды, - деп хабарлайды Massaget.kz тілшісі.

Ол бұл туралы Revue News бағдарламасында сөз қозғады.

"Жеке шығармашылығымдағы жаңалықтар ауыз толтырып айтатындай емес. Бірақ биыл алғаш рет авторлық әнім тыңдарманға жол тартады. Бұл ән маған түсімде келді, бұл әнді ұйықтап жатып жаздым. Бұл әнді қысылмай көрсеткен адам - Әділжан Бакиев. Бұл әнді осы экс-продюсермен бірге орындаймыз", - деді әнші. 

Дильназ Ахмадиеваның шығармашылығындағы жаңалық жалғыз бұл емес. Әнші жақында 6 релиз шығарады. Әнші бұл жолы махаббат тақырыбын таңдапты. 

"Релизде Kyle Ruh, Мәди Рымбаев, Еркеш сияқты композиторлардың әндері болады. Әндердің барлығы дерлік махаббат туралы. Жауапсыз махаббат, мәнді махаббат, менің өмірімде орын алған барлық махаббатты әнмен жеткіземін", - деді ол. 

Еске салайық, бұған дейін әнші Дильназ Ахмадиева сахнада жүргенінe 25 жыл толуына орай келесі жылы жеке концертін өткізетінін айтқан болатын. 

Аптаның басты оқиғалары мен пайдалы видеоларды көру үшін YouTube арнамызға жазылыңыз