Шығыс Қазақстан облысы әкімінің бұрынғы орынбасары Жақсылық Омардан тәркіленген Toyota Camry автокөлігі республикалық меншікке өткізілді. Қазір құны 20 миллион теңгеге бағаланған көлік мемлекеттік заңды тұлғаларға ұсынылып жатыр, - деп хабарлайды Massaget.kz тілшісі "Tengrinews.kz"-ке сілтеме жасап.
Қаржы министрлігінің Мемлекеттік мүлік және жекешелендіру комитетінің мәліметінше, 2024 жылы шығарылған Toyota Camry көлігі 2026 жылғы 8 шілдеде республикалық меншікке қабылданған. Қазіргі таңда автокөлік e-Qazyna мемлекеттік мүлік веб-порталы арқылы мемлекеттік ұйымдарға беру рәсімінен өтуде.
Заңға сәйкес, тәркіленген көліктер алдымен мемлекеттік органдарға ұсынылады. Басымдық құқық қорғау және арнайы мемлекеттік органдарға, сондай-ақ Президент, Парламент және өзге де мемлекеттік құрылымдардың қызметін қамтамасыз ететін ұйымдарға беріледі. Егер көлікке сұраныс болмаса, ол кейін ашық электронды аукционға шығарылады.
Еске салайық, Жақсылық Омар биыл сәуір айында алаяқтық және пара алу фактілері бойынша кінәлі деп танылып, 6 жылға бас бостандығынан айырылған болатын.
Тергеу нұсқасына сәйкес, ол Өскемен қаласының әкімі қызметін атқарып жүрген кезінде танысын кәсіпорын атынан демеушілік көмек ретінде автокөлік рәсімдеуге көндірген. Кейін бұл көлік үшінші тұлғалардың атына аударылып, trade-in бағдарламасы арқылы жаңа Toyota Camry көлігіне айырбасталған. Нәтижесінде мемлекетке 13 миллион теңге көлемінде шығын келтірілген.
Сондай-ақ іс материалдарында бұрынғы шенеуніктің «жалпы қамқорлығы» үшін 20 миллион теңге пара сұрағаны көрсетілген. Арнайы операция барысында оған параның алғашқы бөлігі ретінде 6 миллион теңге табысталған.
Сот үкімімен Жақсылық Омар өмір бойына мемлекеттік қызметте жұмыс істеу құқығынан айырылды. Мамыр айында ол апелляциялық шағым түсіргенімен, сот алғашқы үкімді өзгеріссіз қалдырды.
Instagram парақшамызға жазылып, ең қызықты ақпараттарды бірінші болып оқыңыз!