"Иіскеген адам бірнеше күннің ішінде өліп кетуі мүмкін". БҚО-да қауіпті әтірге қатысты ақпарат тарады

БҚО полицейлері "адам иіскесе өліп кетуі мүмкін" әтірлер туралы тараған хабарламаға қатысты пікір білдірді, - деп хабарлайды Massaget.kz тілшісі "МОЙ Город" сайтына сілтеме жасап. 

Басылым мәліметінше, Батыс Қазақстан облысы тұрғындары аудиохабарлама тарата бастаған. Аудиода әйел адам екі Украина азаматы компанияларды аралап, әтірдің кішірек нұсқасын ұсынып жүргенін айтады. Әйел адамның сөзінше, әтірді иіскеген адам бірнеше күннің ішінде өліп кетуі мүмкін. 

Аудио авторының өзі сондай әтір ұсынған адамдарды дүкеннен қуып жібергенін айтады.  

БҚО полиция департаменті өкілдері аудиохабарламаға қатысты түсінік берді. Ведомство мәліметінше, бұл дерек бойынша полицияға ешқандай арыз-шағым түспеген. Аудиохабарламаға қатысты аудандарға учаскелік инспекторлар жіберілген, алайда ештеңе табылмаған. Ақпарат расталмады. 

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!