И. Тасмағамбетов Универсиада-2017 нысандарының әзірлігін тексерді

Қазақстан Премьер-Министрінің орынбасары, 28-ші Бүкіләлемдік қысқы Универсиада-2017 Ұйымдастыру комитетінің төрағасы Иманғали Тасмағамбетов алдағы Халықаралық студенттік сайыстардың өткізілуіне Алматы қаласы мен Алматы облысындағы нысандардың әзірлігін тексерді, - деп хабарлады ҚР Премьер-министрінің ресми сайты.

Бүгін вице-премьер Универсиаданың спорттық нысандары мен инфрақұрылым нысандарын қарап шықты, функционалдық бағыттардың жұмысымен егжей-тегжейлі танысты.

Көшпелі кеңес барысында И. Тасмағамбетов Алматыдағы Медеу ауданында орналасқан 3 мың орындық «Халық Арена» спорт кешеніне, Универсиада өтетін Атлетикалық қалашыққа, «Алматы Арена» мұз айдыны сарайына, «Сұңқар» ХШТК, «Медеу» мұз айдынына және «Шымбұлақ» тау шаңғы курортына барды. Сонымен қатар, «Табаған» спорт-сауықтыру кешені мен «Алатау» шаңғы биатлон кешенінің жаңғыртылуы және дайындық барысымен танысты.

Алда өтетін Универсиада нысандарының әзірлігі туралы айта келе, вице-премьер спорттық сайыстарға объектілердің дайындық қарқынына көңілі толатындығын білдірді және бірқатар нақты тапсырмалар берді. Сондай-ақ, И. Тасмағамбетов мұндай ауқымды іс-шараның өткізілуі сайысты ұйымдастыру және барлық мүдделі құрылымдар мен ведомстволардың жұмысы тұрғысында егжей-тегжейлі қарауды қажет ететінін атады.

И.Тасмағамбетов іс-шараны өткізу және сайыс қатысушыларын қабылдау аясында қала инфрақұрылымының әзірлігін қамтамасыз ету қажеттігіне, сондай-ақ, Универсиада қонақтарының қауіпсіз және жайлы орналасуын қамтамасыз ету үшін барлық жағдай жасау қажеттігіне баса назар аударды. Бұл ретте ол көлік-логистикалық жүйенің үздіксіз жұмысын қамтамасыз ету өте маңызды екенін көрсетті.

«Универсиаданың басталуына аз ғана уақыт қалды. Барлық кезеңдегі жұмыстар жоғары деңгейде жүріп жатыр. Инфрақұрылым, қатысушыларды және қонақтарды қабылдауға байланысты ұйымдастыру мәселелеріне баса назар аудару қажет. Сонымен қатар, қауіпсіздік, энергетикалық жеткіліктілік пен көлік жүктемесін қоса есептегенде, халықаралық іс-шараның кедергісіз өтуін қамтамасыз етуге қалалық қызметтердің толық әзір болуы өте маңызды. Ең бастысы, Алматыға ағылатын қонақтардың көптігін және спортшылардың, жаттықтырушылар штабы мен тілшілердің сайыс өтетін орынға және қонақжайларға барып-келуін есепке алғанда, бұл қала тұрғындары үшін қолайсыздық туғызбауы тиіс», - деп атап өтті И. Тасмағамбетов.