Грузияның экс-президенті Саакашвили жатқан аурухана палатасынан видео жарияланды
![Грузияның экс-президенті Саакашвили жатқан аурухана палатасынан видео жарияланды](/userdata/news/news_75714/image_l.png)
Грузияның арнайы қылмыстық-атқару қызметі Facebook-парақшасында елдің экс-президенті Михаил Саакашвили жатқан палатаның қауіпсіздік камераларынан 10 минуттық жазба жариялады, - деп хабарлайды "Украинская правда".
Басылым мәліметінше, 14 желтоқсанда Саакашвили адвокаттары арқылы аштық жариялауды қайта бастағанын мәлімдеді. Ол сот процесіне қашықтан қатысып, елге үн қатуды талап етті. Алайда бірнеше сағаттан кейін аштық жариялауды тоқтатқаны белгілі болды.
Грузияның қылмыстық-атқару қызметі Саакашвили аштық жариялаған күні видео жариялады. Ведомство өкілдері қоғам қызығушылық танытуына байланысты жазбаны көрсетіп отырғанын атап өтті.
Видеода "Вивамеди" клиникасының кадрлары әртүрлі күндермен көрсетілген: 9 тамыз, 4 қазан, 12 желтоқсан. Ал бір бөлігінде күндер өшірілген. Кейбір кадрларда Саакашвили тамақ ішеді, ұйықтайды, палатада жүреді, тіпті медицина қызметкерлерімен жанжалдасады. 12 желтоқсанда Саакашвили жүріс арбасының көмегімен қозғалады және әлсірегені көрінеді.
Пенитенциария қызметі өкілдері видеода "сот төрелігін жүзеге асыруға кедергі жасау, қоғам мен халықаралық әріптестерді адастыру мақсаты Саакашвилидің әрекеттерінен айқын көрінетінін" мәлімдейді.
Сондай-ақ, мемлекеттік орган экс-президентті қызметкерлерге қатыгездік пен дөрекі мінез-құлық жасады деп айыптайды.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
Ж. Қадыржанова