Гастроэнтеролог кімдерге шикі көкөніс жеуге болмайтынын айтты

Дұрыс тамақтану ережесінің бірі - тәулігіне 25-30 грамм талшық, яғни күніне 400 грамм көкөніс пен жеміс жеу қажет. Алайда, шикі көкөністерді бәріне жеуге болмайды, өйткені шикі көкөніс кейбір ауруларды қоздыруы мүмкін. Бұл туралы гастроэнтеролог Евгений Мельникова ескертті, - деп хабарлайды Massaget.kz тілшісі "Газете.Ru" сілтеме жасап.

Дәрігер көкөніс - дәрумен, минерал мен антиоксиданттың көзі екенін атап өтті. Бірақ асқазан-ішек жолдарының ауруларына шалдыққан адамдар көкөністі тым көп тұтынбағаны жөн.

"Гастроэзофагеальді рефлюкс ауруы (Gerd), созылмалы гастрит, асқазан жарасы, он екі елі ішектің ойық жарасы ауруларымен ауыратын адамдарға шикі көкөністерді жеуге болмайды. Ең алдымен, қызанақ, пияз, сарымсақ, қызыл бұрышты тұтынудан бас тарту қажет. Әйтпесе, шырышты тұз қышқылының бөлінуі жоғарылайды, асқазанда қысым жоғарылайды, төменгі өңеш сфинктері босаңсиды, сөйтіп ауыр қыжыл пайда болады", - деп ескертті дәрігер.

Оның айтуынша, созылмалы холецистит, өт қабының және өт жолдарының дискинезиясы бар көптеген адам шикі көкөністі көбірек жеуге тырысады, бірақ мұндай "майсыз" диета өт қабының дұрыс жиырылуының бұзылуына әкеп соқтырып, өтті қалыңдатады. Салдарынан өт тоқырайды, тас түзіледі, гепатобилиарлы жүйенің аурулары өршиді.

"Ішектің қабырғаларын тітіркендіретін шикі көкөністер оның жиырылуына, моторикасының жоғарылауына және ашытуына әкеледі. Әрине, бұл қалыпты реакция. Бірақ егер ішекте қабынуға, тітіркенуге, бактериялардың көбеюіне, моториканың бұзылуына байланысты мәселе болса, онда ашыту күшейеді, газ, тітіркендіргіш заттар пайда болады, ол ауыра бастайды, ісінеді, нәжіс бұзылады", - деп қосты Евгений Мельникова.

Сондықтан, гастроэнтеролог ойық жаралы колит, Крон ауруы, тоқ ішектің дивертикулярлық ауруы, жедел ішек инфекциясы, тітіркенген ішек синдромымен ауыратын адамдарға тұтынуға тек термиялық өңдеуден өткен көкөністерді ұсынды.

Тағы да оқи отырыңыздар: 1 мамыр – Қазақстан халықтарының бірлігі күні. Эссе

Аптаның басты оқиғалары мен пайдалы видеоларды көру үшін YouTube арнамызға жазылыңыз