Ғалым түйе сүтінен пайдалы сусын жасап шығарды

Атыраулық биолог-ғалым София Сағындықова түйе сүтіне қызылша шырынын қосып, шипалы сусынды өндіріске енгізді, - деп хабарлайды Massaget.kz тілшісі "Хабар 24" телеарнасына сілтеме жасап.

София Зұлқарнайқызы шипалы сусынды зерттеуге 20 жыл арнаған. Жаңа өніміне қажет шикізатты табу үшін Алматы, Ақтөбе, Қызылорда, Маңғыстау өңірінде өндірілетін шұбат құрамын зерттеген. Ондағы сүт қышқылы бактерияларын зерттеп, талай сынама да алған. Ізденуден шаршамаған ғалым қазір бейнетінің зейнетін көріп отыр.

"Қазір көптеген анада сүт жетіспейді. Бала өскеннен кейін де беруге болады. Қазір көптеген адамның иммунитеті төмен. Иммуномодулятор ретінде қолдануға болады. Дұрыс тамақтанған жөн деп есептеймін. Антибиотик қабылдаған уақытта одан кейін міндетті түрде пробиотик ішу керек. Пробиотик ретінде біздің сусында қолдануға болады", - деді ол.

София Сағындықова жаңа өніміне "СофМайя" деп ат қойған. Бұл өзінің есімі мен ұстазы, белгілі биолог Майя Шығаеваның құрметіне қойылған.

Қазір жаңа өнім Ғылым және жоғары білім министрлігінің "Ғылым қоры" арқылы "ғылыми зерттеу нәтижесін қаржыландыру жобасы" аясында грантқа ие болған. Енді Маңғыстау облысындағы сүт зауытынан шипалы сусынды шығару жоспарланып отыр.

Қызықты жаңалықтар мен видеоларды көру үшін TikTok арнамызға жазылыңыз!