Бақытжан Қойбеков - Маңғыстау облыстық көпсалалы ауруханасының орталық меңгерушісі. Оған 2024 жылы 25 желтоқсанда болған Ақтаудағы ұшақ апаты кезінде жарақат алған жолаушыларды емдеу міндеті жүктелді. Massaget.kz тілшісі қайғылы апат кезінде көпке көмек көрсеткен маманмен сұхбаттасты.
"Сол күнді еске алу өте ауыр"
Бақытжан мырза 12 жылдық тәжірибесі бар реанимотолог дәрігер. Ол желтоқсанның жиырма бесін үлкен күрсініспен еске алды. Дәрігер қайғылы апат болған күні әдеттегідей жұмыста болғанын айтты. Апат болғанын естігеннен кейін бір сағат ішінде науқастарды қабылдауға жабдықтарды дайындап, сақадай-сай тұрдық дейді ол.
"Төтенше жағдайды естігенде төбемізден жай түскендей болды. Оның үстіне ұшақ апатынан кейінгі адамдардың халін елестету мүмкін емес. Не де болса қызметкерлерге тапсырмаларды беріп, жабдықтарды алдын ала дайындатып қойдым", - дейді ол.
Айтылған уақытта апаттан зардап шеккен науқастар келе бастаған. Бақытжан Рысұлы бірінен кейін бірі келіп жатқан жарақат алған адамдарды көріп, абдырап қалғанын жасырмады.
"Науқастарды бірінен кейін бірін әкеліп жатты. Сол сәттегі сезімді сөзбен айтып жеткізу мүмкін емес. Алдымда тек бір ғана мақсат болды. Келгендердің бәрінің өмірін сақтап қалсақ дедім. 29 науқас жеткізіліп, оның 11-і жансақтау бөліміне жатқызылды. Қызыл аймақ арқылы науқастарға диагноз тағайындап, диагностикадан өткізіп, томографиялық талдау жасатуға жіберіп отырдым", - деді ол.
сурет: дәрігердің жеке архивінен
Аман қалғандардың көбі қандай жарақатпен келді?
Дәрігердің сөзінше, жарақат алғандардың көбінде бас миының шайқалуы тіркелді. Арасында травматологиялық жарақаттар да жиі кездескен. Сондай-ақ дәрігер жүрегі соқпай қалған әзербайжандық әйелдің өмірін аман алып қалғанын айтты.
"Біз әуелі маңызды ағзаларды сақтап қалуға тырыстық. Келген науқастардың жағдайын сөзбен айтып жеткізу мүмкін емес. Қабырғалары, бас-сүйектері сынған, миы шайқалған науқастар көп болды. Арасында жүрегі тоқтап қалған әзербайжандық азамат та болды. Жүрегіне едел-жедел массаж жасап, желдету құрылғысына қостық. Жүрегі қайта соқты. Бірақ миы қатты шайқалған, аса қатты психологиялық шок алған еді. Кейін жағдайы жақсарды", - деді маман.
"Уайымнан қолдарын қатты қысып, көгертіп жіберген"
Жеткізілген 29 науқастың барлығы аман қалды. Бақытжан мырза шок жағдайында қалған барлық жанға психологиялық қолдау көрсетілгенін айтты. Есін жиған жандардың алғашқы әңгімесін де бөлісті.
"Бастапқыда бар ойымыз, адамның өмірі болды. Олармен тілдесетін мұршамыз болмады. Кейін есін жиған жандарға психологиялық қолдау білдірдік. Жүрегі тоқтап, қайта соққан әлгі әзербайжандық азаматтың қолының көгеріп кеткенін байқадық. "Бұған не болған" деп сұрап едік, "жанымда отырғандар уайымнан қолымды қатты қысып ұстады. Содан көгеріп қалған болар" деп жауап берді. Осындай жағдайларды естігенде жанымыз ауырды. Кей науқастар есін де жоғалтып алған. Жағдайдың қалай болғанын білмейтіндер де кездесті", - деді дәрігер.
Беті бері қараған шетелдік азаматтар еліне қайтатын кезде ұшаққа мінуге қорқып қалған. Оларға қажетті қолдау білдіріп, барынша сабырға шақыруға тырыстық дейді маман.
"Апаттан кейін ұшаққа қайта мінбеймін деген жандар да кездесті. Оларды аман-есен еліне қайтару үшін барынша қолдау білдірдік. Психологтар жабыла жұмыс істеді", - деді Бақытжан Қойбеков.
Болмасын апат, болмасын...
Бақытжан Қойбеков осы оқиғадан кейін ерлік, кәсібилік және азаматтық жауапкершілік танытқаны үшін Мемлекет басшысы Қасым-Жомарт Тоқаевтың Жарлығымен "Құрмет" орденімен марапатталды. Дәрігер тілек-ниетін бөлісіп, сезімін жеткізді.
"Мен азаматтық борышымды атқардым. Жалғыз мен емес, ұжымның еңбегі. Жарақат алған науқастардың барлығы аман қалды. Тілегіме жеттім, шүкір! Еліміз мұндай апаттардан ада болып, төтенше жағдайларды бастан кешірмесін. Тек тыныштық болғай", - деп тілек білдірді дәрігер.
Еске салайық, 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл - Azerbaijan Airlines әуе компаниясына тиесілі Embraer 190 ұшағы. Алдын ала ақпарат бойынша ұшақ бортында 67 адам, оның ішінде 5 экипаж мүшесі болған.
Көлік министрлігі ұшақ бортында болған адамдар жөнінде алдын ала мынадай ақпарат жариялады: бортта 37 Әзербайжан, 6 Қазақстан, 3 Қырғызстан, 16 РФ азаматы болған.
Аптаның басты оқиғалары мен пайдалы видеоларды көру үшін YouTube арнамызға жазылыңыз
Д. Литпин