Қарағандыда ережесіз жекпе-жек жарысында қатты соққы алған спортшы бес күннен бері комада жатыр. Октагоннан ессіз күйде шығарылған 18 жастағы Арслан Атымтаевқа ота жасалған. Бірақ жағдайы әлі ауыр, - деп хабарлайды Massaget.kz тілшісі "КТК" телеарнасына сілтеме жасап.
Спортшының туғандары полицияға арызданып, қылмыстық іс қозғалды. Бірақ олар спортшының қарсыласы емес, жарысты ұйымдастырушылар жазаға тартылсын дейді.
Жарыс Қарағандыда 14-15 ақпанда өткен. Арслан бірінші күні екі қарсыласын ұтқан. Келесі күні ақтық сынға шығады. Қатты соққыны сол кезде алған. Баланың есеңгірегені видеода анық көрініп тұр. Екінші раундқа делсал күйде шыққан ол, тағы бірнеше соққы алып, қарсыласа алмай отырды да қалды.
"Бірінші раундта соққыға жығылды, тыйым салынған соққыдан. Сол жерде тұрған рефери төрешілер, жеке жаттықтырушысы баланың жағдайына қарамай, екінші рауындқа шығарып жібереді. Бірақ ол жаңағы соққыдан кейін, бала басқа құлағаннан кейін, тоқтатып, баланы қарап, тексеріп, екінші шабуылға дәрігердің рұқсатымен ғана шығару керек еді", - Атымтаевтың апасы Бақытжан Қалиева.
Арслан октогоннан шығысымен комаға кеткен. Ұйымдастырушылар жедел жәрдем шақыртудың орнына, есінен танған баланы жеке көлікпен ауруханаға апарыпты. Туыстарын ашындырып отырғаны да осы. Балаға медициналық көмек дер кезінде көрсетілмеген. Бұлар жеткізген ауруханада нейрохирург болмаған. Ол басқа ауруханадан келіп ота жасағанша, үш сағат жоғалтыпты. Дегенмен жарысты ұйымдастырушылар бәрін регламент бойынша жасадық, бізден кінә жоқ деп отыр.
"Иә, ол соққы алды, бірақ бұл рұқсат етілмеген тәсіл емес. Соққыдан кейін есінен танып қалған жоқ. Сондықтан белдесу жалғаса берді. Іс-қимылынан қауіпті байқамадық. Мен Арслан тарапынан қарсыласу белгілері жоғалған соң, белдесуді тоқтаттым. Мүмкін бала өзін жайсыз сезініп ауырып тұрды ма, оны енді оның жеке бапкерінен сұрау керек", - деді жарыстың бас төрешісі Әділет Нұрмадиев.
Туыстарының арызы бойынша қылмыстық іс қозғалған. Бірақ байқамай, басқаның денсаулығына зиян тигізу бабы бойынша оның сол кездегі қарсыласы жауапқа алынбақ. Бірақ Арсланның жақындары баланың жағдайын бағамдай алмаған бапкері, рефери мен төрешілер жазалануға тиіс деп отыр. Арслан әлі ауыр күйде жатыр.
Instagram парақшамызға жазылып, ең қызықты ақпараттарды бірінші болып оқыңыз!