Еліміздің екі өңірінде терроризм актісі туралы жалған хабар берген күдіктілер ұсталды
![Еліміздің екі өңірінде терроризм актісі туралы жалған хабар берген күдіктілер ұсталды](/userdata/news/news_93988/image_l.jpg)
Полиция қызметкерлері терроризм актісі туралы көрінеу жалған хабарлаған күдіктілерді "ізін суытпай" ұстады, - деп хабарлайды Massaget.kz тілшісі polisia.kz-ке сілтеме жасап.
5 қараша кешкі уақытта Қызылорда облысы полиция департаментінің 102 пультіне ұялы телефоннан бейтаныс адам қоңырау шалып, кенттердің біріндегі үйлер арасында жарылғыш зат жасырылғанын хабарлады.
Оқиға орнына арнаулы және құқық қорғау органдарының мамандары жұмылдырылды. Техниктер мен кинолог мамандар жүргізген тексеру кезінде жарылғыш заттың жоқ екенін анықтады.
Жедел-іздестіру іс-шараларын жүргізген полицейлер 39 жастағы жергілікті тұрғынды анықтап, ұстады.
Белгілі болғандай, ер адам анасымен жанжалдасып, анасы үйінен кетіп қалған. Оны қайтару үшін күдікті мас күйде полицияға қоңырау шалып, бомба туралы жалған хабар берген.
Павлодар облысында да осыған ұқсас жағдай болды.
6 қараша таңғы уақытта Павлодар облысы полиция департаментінің 102 пультіне қала тұрғындарының бірі қоңырау шалып, облыс орталығындағы үйлердің біріне бомба қойылғанын айтқан.
Ақпарат расталмады. Тәртіп сақшылары 28 жастағы күдіктіні тез арада анықтап, құрықтады.
Ер адам мас күйде болғаны белгілі болды.
Екі факті бойынша да Қылмыстық кодекстің 273-бабымен ("Терроризм актісі туралы көрінеу жалған хабарлау") қылмыстық іс қозғалды. Тергеу жүргізіліп жатыр.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
М. Лұқпан