Елена Рыбакина Уимблдондағы жеңісі үшін берілетін сыйақыдан бас тартты

Елена Рыбакинаға мемлекет тарапынан Уимблдондағы жеңісі үшін сыйақы қарастырылмаған. Ал Рыбакинаның өзі Қазақстан теннис Федерациясынан берілетін сыйлықақыдан бас тартқан, - деп хабарлайды Massaget.kz.

Спорт және дене шынықтыру істері комитеті Елена Рыбакинаның Уимблдон-2022 финалындағы жеңісі үшін мемлекеттен неге төлем алмайтынын түсіндірді.

"Халықаралық жарыстардың чемпиондарына, жүлдегерлеріне, сондай-ақ жаттықтырушыларға ақшалай көтермелеу Үкіметтің 2007 жылғы 28 наурыздағы № 152 қаулысының негізінде жүзеге асырылады. Уимблдон турнирі коммерциялық болғандықтан, республикалық бюджеттен ақшалай төлемдер қарастырылмаған", - деп түсіндірді комитетте.

Елена Рыбакинаның өзі Қазақстан теннис Федерациясынан берілетін сыйлықақыдан бас тартқан.

"Біз Еленаға қаржылай көмек бергіміз келген, алайда бас тартты. Одан бөлек, ол жүлде үлесін қайырымдылық пен юниорларды қолдауға жұмсағысы келеді", - дейді ҚТФ вице-президенті Юрий Польский "Матч ТВ-ге" берген сұхбатында.