Дүкен қызметкерлері тексеріске келген шенеуніктің куәлігін алып, қуып шыққан
![Дүкен қызметкерлері тексеріске келген шенеуніктің куәлігін алып, қуып шыққан](/userdata/news/news_70107/image_l.png)
Қырғызстанда дүкен қызметкерлері тексеріске келген монополияға қарсы реттеу қызметі төрағасының орынбасары Ақжолтой Тукуновты ғимараттан шығарып жіберіп, куәлігін алып қойған, - деп хабарлайды 24.kg.
Басылым мәліметінше, 31 шілдеде сағат 22.00-де жаңадан тағайындалған шенеунік мекеме әкімшілігіне түсіндіру жұмыстарын жүргізу мақсатында Шу облысы Аламедин ауданы Маевка ауылындағы "Березка" дүкеніне барған. Монополияға қарсы қызмет басшысының орынбасары мұнда азық-түлік қымбат екенін атап өткен. Біраз уақыттан кейін оған Витя есімді ер адам келіп, шенеуніктен түсірілімді тоқтатып, мекемеден кетуін талап еткен.
Дүкен қызметкерлері Ақжолтой Тукуновқа жұмыс уақытында, яғни сағат 9.00-ден 18.00 аралығында келгені дұрыс екенін әрі тексеріске рұқсатпен келуі керегін айтып, шығарып жіберген. Олар Ақжолтой Тукуновтың көмекшісінің де құжаттарын алған.
Айта кетейік, белсенді Ақжолтой Тукунов 5 шілдеде монополияға қарсы реттеу қызметі төрағасының орынбасары болып тағайындалған.
Ж. Қадыржанова