Танымал қазақстандық әнші Димаш Құдайберген Қазақстанның Халық әртісі Бибігүл Төлегенованың креативті мектебінің ашылуына қатысты, - деп хабарлайды Massaget.kz тілшісі.
Бұл туралы Dimashnews.kz сайты хабарлады.
1 қыркүйек Білім күнінде Астана қаласында Қазақ вокал өнерінің негізін қалаушылардың бірі, ұлы әнші және халық әртісі Бибігүл Ахметқызы Төлегенова атындағы алғашқы жеке креативті мектептің ашылуы өтті.
Мектептің ашылу салтанатына Қазақстан Республикасының Халық әртісі және опера әншісі Бибігүл Төлегенова, мектептің бас құрылтайшысы және Forbes Kazakhstan баспагері Арманжан Байтасов және Қазақстан Республикасының Халық әртісі Димаш Құдайберген қатысты.
Бибігүл Төлегенова атындағы шығармашылық мектебі (BTCS) - инновациялық білім беру тұжырымдамасын ұсынатын заманауи білім беру орталығы. Мұнда балалар негізгі білім алатын пәндермен қатар креативті факультеттерде өздерінің шығармашылық таланттарын дамыта алады.
Әртүрлі музыкалық жанрларды, музыка теориясы мен орындаушылық өнерді зерттеу Music факультеті аясында өтеді.
Digital факультеті бағдарламалауды, веб-әзірлеуді, жасанды интеллект пен киберқауіпсіздік саласындағы әртүрлі озық технологияларды үйретеді.
Бейнелеу өнері, графикалық және архитектуралық дизайн арқылы балалардың шығармашылық ойлауын дамытуға арналған арнайы Аrt факультеті сыныбы бар.
STEM факультеті физика, химия, биология, инженерия және робототехника бағдарламаларын қамтиды.
Димаш Құдайберген мен Арманжан Байтасов болашақ оқушыларды Білім күнімен құттықтап, жаңа ұрпақтың жаңа Қазақстанның дамуына зор үлес қосатынына сенім білдірді.
Аптаның басты оқиғалары мен пайдалы видеоларды көру үшін YouTube арнамызға жазылыңыз