Ақтөбелік дәрігердің жантүршігерлік өліміне қатысты үкім шықты, - деп хабарлайды Massaget.kz тілшісі.
Сот мәліметінше, сотталушы Ш. деализдік орталықта медицина қызметкері болып, 1956 жылы туған дәрігер А.-ға көмектесіп жүрген. Оның ұялы телефонына банк қосымшаларын жүктеп, олардың құпия сөздерін орнатып беріп, есеп шотында қомақты ақша барын көрген. Жәбірленуші А. көзін емдету үшін Астанаға баратын кезде сотталушы Ш.-ға қарап қою мақсатында пәтерінің кілтін де беріп қойған.
"Жәбірленуші А.-ның жалғыз тұратынын білетін сотталушы Ш.-да оны пайдакүнемдік ниетпен өлтіру туралы ой туындаған. Сөйтіп, ол пәтерде күтіп, маңызды органдарын балтамен бірнеше рет ұрып, өлтіріп, үйдегі тоңазытқышқа салып қойған", - деп жазылған сот мәліметінде.
Кейін Ш. алдын-ала сатып алған арнайы масканы тағып, жәбірленушінің есеп шоттарынан 5 268 000 теңге шешіп алған. Сонымен қатар, А.-ның жалпы құны 1 966 860 теңге тұратын ұялы телефонын, ноутбук пен планшетін ұрлап кеткен.
Сотталушы Ш. ҚК-нің 99-бабы 2-бөлігі, 8-тармағы, 188-бабы 3-бөлігі, 1-тармағы бойынша кінәлі деп танылып, оған қылмыстардың жиынтығы бойынша жазаларды ішінара қосу арқылы түпкілікті 20 жылға бас бостандығынан айыру жазасы тағайындалды.
Сот үкімі заңды күшіне енген жоқ.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!