Қазақстанда алдағы демалыс күндері, яғни 8-10 тамыз аралығында ауа райы ыстық әрі құрғақ болады. Синоптиктердің болжамынша, еліміздің бірқатар өңірінде ауа температурасы +41 градусқа дейін көтеріледі, - деп хабарлайды Massaget.kz тілшісі.
«Қазгидромет» мәліметінше, Иран аумағынан келетін жылы ауа массаларының әсерінен елдің барлық өңірінде температура жоғарылайды.
Солтүстік және шығыс облыстарда күндізгі ауа температурасы +35...+39 градусқа дейін жетсе, оңтүстік өңірлерде +35...+41 градусқа дейін аптап ыстық күтіледі. Ал батыс пен орталық аймақтарда ауа температурасы +36...+41 градусқа дейін көтеріліп, кей жерлерде өте қатты ыстық болады.
Сонымен қатар елдің батысы мен солтүстік-батысында кезең соңында атмосфералық фронттардың әсерінен жаңбыр жауып, найзағай ойнайды, жел күшейеді. Кейбір аудандарда бұршақ түсуі мүмкін.
Шығыс Қазақстанда кезең басында жауын-шашын күтілсе, оңтүстік және оңтүстік-шығыстың таулы аймақтарында үш күн бойы жаңбыр мен найзағай болжанып отыр.
Синоптиктер тұрғындарға аптап ыстық күндері күннің астында ұзақ жүрмеуге, көбірек су ішуге және қауіпсіздік шараларын сақтауға кеңес береді.
Өзекті жаңалықтарды өз уақытында оқу үшін Facebook парақшамызға жазылыңыз!
Ж. Қадыржанова