Дәстүрлі әнші 7 сағатта 100 ән орындап, рекорд жаңартқысы келеді

Семейлік дәстүрлі әнші 100 әнді бірден орындап, Гиннестің рекордтар кітабына кіргісі келеді, - деп хабарлайды Massaget.kz тілшісі.

Ол бұл туралы 24.kz-ке берген сұхбатында айтты. 

Дәстүрлі әнші Қайрат Қабышев - Жәнібек Кәрменовтің шәкірті. Қазақстанның еңбек сіңірген әртісі Жәнібек Кәрменовтің шәкірті жылдар бойы таңды-таңға асырып, қазақ әндерін тоқтамай шырқап жаттыққан.

Қазір мәдениет саласының үздігі дәстүрлі ән өнерінің 5 мектебіне енетін шығармаларды түгел жатқа біледі екен. Әнші Гиннестің рекордтар кітабына ену үшін ұйымның өкілдеріне арнайы шақырту жіберейін деп жүргенін айтты. 

"Ерте кезде Гиннесс рекорды жоқ қой. Ата-бабамыз - таңды атырып, тойдың басында отырып ән айтқан, жыр айтқан ғой. Сондықтан мен ештеңені ойдан шығарған жоқпын. Мақтанатын ештеңем жоқ. Мен қазақтың кезінде ұмытылып қалған дәстүрін жаңғыртамын", - деді Қайрат Қабышев.

Оның айтуынша, 100 әнді орындауға кем дегенде жеті сағат уақыт кетеді, арасында әңгіме-дүкен құрар болса, он сағатқа дейін созылуы мүмкін. 

Аптаның басты оқиғалары мен пайдалы видеоларды көру үшін YouTube арнамызға жазылыңыз