Егде жастағы адамдарда жүрек ауруы кеуде деңгейінде болса, салдарынан арқасы ауыруы мүмкін. Бұл туралы терапевт, медицина ғылымдарының кандидаты Андрей Кондрахин айтты, - деп хабарлайды Massaget.kz тілшісі "Москва 24-ке" сілтеме жасап.
Дәрігердің айтуынша, инфаркт арқаның ауырсынуы арқылы басталуы мүмкін, сондықтан дереу тексеруден өтіп, ЭКГ жасау маңызды.
"Егер ауырсыну бел аймағында байқалса, біз оның құяң екеніне үйреніп қалғанбыз. Бірақ егер ыңғайсыздық күшейе түссе, бұл бүйрек проблемалары, пиелонефрит белгісі болуы мүмкін. Егер бұл ауруға күдік болса, зәр анализін тапсыру қажет", - деді маман.
Кеуде қуысынан сәл төмен белде ауырсыну пайда болған жағдайда науқаста панкреатит, холецистит немесе асқазан жарасы дамуы мүмкін. Қартайған кезде арқадағы ауырсынудың басқа себептеріне остеохондроз немесе омыртқа ауруы жатады.
Еске салайық, бұған дейін арқа аурулары мазаламауы үшін егде жастағы адамдарға арналған жаттығулар тізімі жарияланған болатын.
Жаттығулар:
Екі алақаныңызды бір-біріне ысқылап, қолыңызды жуып жатқандай қимылдар жасаңыз;
Қолыңыздың саусақтарын жеңіл қимылдармен бірнеше рет ашып-жұмыңыз. Екі қолыңыздың саусақтарын бір-бірімен айқастырып, жоғарға қарай тартылыңыз;
Қолыңызды беліңізге қойған күйі, беліңізді алақандарыңызбен жоғары-төмен сипаңыз;
Қолыңыз белде тұрған күйі басыңызбен денеңізді ақырын оң және сол жаққа қарай еңкейтіңіз. Бұл жаттығуды тез, асығыс жасауға болмайды;
Саусақтарыңыздың ұшын екі иыққа тигізген күйі шынтақтарыңызды иықтың деңгейіне көтеріп, екі иығыңызды алға және артқа қарай айналдырыңыз;
Қолыңызды беліңізге қойыңыз, аяқтарыңыз иықтың деңгейінде болсын. Арқаңызды тік ұстауға тырысыңыз. Денеңізді бірқалыпты солға, одан кейін оңға бұрыңыз. Бас пен дене бірдей қозғалуы керек. Бұл жаттығуды ақырын жасау керек, деміңіздің бір темпте қалуын қадағалаңыз;
Қолыңызды белге қойған күйі, аздап алға қарай еңкейіңіз. Жаттығу кезінде мойын мен иықтың бұлшықеттерін бос ұстаңыз. Бірқалыпты демалыңыз, осы күйде 15-30 секунд тұрыңыз.
Аяқ жаттығуы барыншы нәтижелі болсын десеңіз, жұмсақ бұдырлы резеңке төсемді қолданыңыз. Әдетте, ортасындағы бұдырлар биіктеу, ал шет жақтарындағы аласалау келетін төсемдер табанның табиғи формасын қалпына келтіруге көмектеседі. Бұндай резеңке төсемдер табанның негізгі нүктелеріне әсер етіп, ағзаның қан айналым жүйесін реттейді, бүйрек пен ішектердің жұмысын қалпына келтіреді;
Аяқтың ұшынан бастап, өкшеге қарай резеңке төсемді салмағыңызбен басыңыз. Содан соң, резеңке төсемге аяқтарыңызды алма-кезек қойып, басып тұрыңыз;
Тобығыңызды алдымен солға, одан соң оңға қарай айналдырыңыз.
Қандай жасқа келсеңіз де жақсы денсаулықтың кепілі жақсы көңіл күйде екенін ұмытпаңыз. Сондықтан анау-мынау майда-шүйде заттарға назар аудармаңыз, мейлінше отбасыңызбен, жақын адамдарыңызбен бірге болуға тырысыңыз.
Өзекті жаңалықтарды өз уақытында оқу үшін Facebook парақшамызға жазылыңыз!