Бұралқы иттер тұрғындарды талай бастады: Аршалылық жұртшылық иттердің шектен тыс көбейгенін айтып шағымданды
![Бұралқы иттер тұрғындарды талай бастады: Аршалылық жұртшылық иттердің шектен тыс көбейгенін айтып шағымданды](/userdata/news/news_99379/image_l.jpg)
Аршалы жұрты бұралқы иттердің шектен тыс қаптап, тіпті адамдарға әсіресе балаларға ұмтылуы жиілеп жатқанын айтып зар илеп отыр. Тұрғындар жергілікті атқарушы органдардың тарапынан еш әрекет болмаған айтып шырылдайды, - деп хабарлайды Massaget.kz тілшісі.
Кент тұрғындарының айтуынша, қаңғыбас иттер әсіресе адамдар көп жиналатын дүкен, балабақша мен мектептердің маңында топ-тобымен өріп жүреді. Оның ішінде "иелері бар, бірақ босатып жіберген иттер де жетерлік" дейді олар.
"Мектепке жаяулап баратын балаларымыз үшін қатты қорқамыз. Талап, жарымжан ете ме деп күн сайын зәреміз ұшады. Тіпті ересек адам болсақ та өзіміз де қатты қорқамыз. Олардың арасында тіпті мойнына кісен таққан, байлаулы шынжыры бар иттер де бар. Иелері босатып қоя береді. Күндердің бір күні балаларды талап, жарып, жарымжан етіп яки өлтіріп тынуы әбден мүмкін. Билік осындай орны толмас өкінішті жағдай болғанда ғана иттерді аулай ма? Ит аулаушылардың телефон нөмірлерін берді. Бірақ оған мүлде хабарласа алмайсың. Телефондарын көтермейді. Ал бұралқы иттердің саны мүлдем көбейіп барады. 12-15 иттен өріп жүр. Өтіп жатқандарға қарсы ұмтылатындары да бар. Ертең балаларға шауып, талап өлтірсе кім жауап бермек?" - дейді Екатерина Евсеева.
Фото: Massaget.kz
Желідегі жұрт Аршалы кенті ғана емес Жалтыркөл, Жібек жолы сияқты бірнеше ауылда бұралқы қаңғыған иттердің мейлінше қаптап кеткенін айтты.
"Олар біреу-міреуді иттер жарып тастағанын күтіп жүр. Тек сонда ғана иттерді аулауға кірісуі мүмкін", "Олар жылына бір-ақ рет аулауға шыға ма?", "Қаңғыбас иттер көп оның үстіне адамдар өздері иттерін босатып қоя береді", - деп жазды тұрғындар.
Фото: Massaget.kz
Ит аулаушылардың әрекетсіздігін туралы аршалылық халық шулап жатқанымен Ақмола облысы ветеринариялық басқармасы былтыр Аршалы ауданында иттердің ауланғанын мәлім етті.
"Өткен жылы Аршалы ауданында 435 ит ауланды. Биыл конкурстық рәсімдер жүргізіліп жатыр. Конкурстың аяқталған соң бірыңғай оператор бұралқы иттерді аулаумен айналысатын болады", - деді Ақмола облысының ветеринария басқармасынан.
Абзал АЛПЫСБАЙҰЛЫ
Тағы да оқи отырыңыздар: Баланы футболға қай жаста беру керек?
Аптаның басты оқиғалары мен пайдалы видеоларды көру үшін YouTube арнамызға жазылыңыз
Massaget.kz