Бірінші шақырылымдағы Құрылтай төрағасы сайланды

Айбек Дәдебай жаңа Құрылтайдың төрағасы болып сайланды, - деп хабарлайды Massaget.kz тілшісі.

"Қазақстан Республикасының Құрылтайы және оның депутаттарының мәртебесі туралы" конституциялық заңның 11-бабына сәйкес Мемлекет басшысы Құрылтай төрағасы лауазымына Айбек Дәдебайдың кандидатурасын ұсынды.

"Ең алдымен, Құрылтайдың басшылық құрамын сайлап, құрылымын қалыптастыру қажет. Өздеріңізге мәлім, Конституцияның 57-бабына сәйкес Құрылтай төрағасы лауазымына кандидатураны Президент ұсынады. Мен жауапкершілігі зор бұл лауазымға Айбек Арқабайұлы Дәдебайдың кандидатурасын ұсынамын. Сіздер бұл тұлғаны жақсы білесіздер. Ол мемлекеттік басқару жүйесінде көп жыл қызмет етті. Тәжірибесі мол деп айтуға болады. Өзінің білімді, отаншыл, адал азамат екенін нақты істерімен дәлелдеді. Сондықтан оны осы лауазымға лайық деп санаймын. Құрылтай депутаттарынан Айбек Арқабайұлы Дәдебайдың кандидатурасын қолдауды сұраймын", - деді Президент бұған дейін.

Құрылтай төрағасын сайлау тікелей жасырын дауыс беру арқылы өтті. Депутаттар арасынан есеп комиссиясы құрылды. Комиссия дауыс беру барысын және дауыстарды санау үдерісін қадағалады.

Осылайша бірінші шақырылымдағы Құрылтай спикері болып Айбек Дәдебай сайланды.

Айбек Дәдебай туралы не белгілі?

Ол 1980 жылы 1 сәуірде Алматы қаласында туған. 2001 жылы Абылай хан атындағы Қазақ халықаралық қатынастар және әлем тілдері университетін тәмамдаған. 2003 жылы осы университеттің магистратурасын бітірген. Бұған дейін мынадай қызметтер атқарған:

• 2001-2002 жылдары Қазақ халықаралық қатынастар және әлем тілдері университеті Халықаралық туризм менеджменті кафедрасының оқытушысы болып жұмыс істеген;
• 2008-2011 жылдары - Парламент Сенаты аппаратының Парламентаралық байланыстар және халықаралық ынтымақтастық бөлімінің сарапшысы, Қазақстан Республикасы Парламентінің Сенаты төрағасы көмекшісінің міндетін атқарушы;
• 2011-2013 жылдары - Қазақстан Республикасының БҰҰ-дағы тұрақты өкілдігінің үшінші хатшысы, атташе;
• 2013-2019 жылдары - Қазақстан Республикасы Парламенті Сенаты төрағасының хатшылығы меңгерушісінің орынбасары, меңгерушісі;
• 2019-2021 жылдары - Қазақстан Республикасы Президенті кеңсесі бастығының орынбасары;
• 2021 жылғы мамыр мен 2022 жылғы қаңтар аралығында Қазақстан Республикасы Президенті Іс басқарушысының орынбасары болып жұмыс істеді.
• 2022 жылғы қаңтардан бастап Қазақстан Республикасы Президентінің Іс басқарушысы болды. 
• 2024 жылы 6 ақпанда Президент әкімшілігінің басшысы болып тағайындалды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!