"Бірнеше ота жасалды". Алматыда ер адам 8-қабаттан құлап кетті
!["Бірнеше ота жасалды". Алматыда ер адам 8-қабаттан құлап кетті](/userdata/news/news_83416/image_l.jpg)
Алматылық дәрігерлер 8-қабаттан құлап кеткен ер адамды аман алып қалды. Оған бірнеше ота жасалды, - деп хабарлайды Massaget.kz тілшісі Қалалық Қоғамдық денсаулық сақтау басқармасына сілтеме жасап.
19 жастағы жігіт аурухананың қабылдау бөліміне аса ауыр халде жеткізілген. Науқас шұғыл түрде жан сақтау бөліміне жатқызылды. Дәрігерлер оның миы шайқалып, жабық бас-ми жарақаты салдарынан бірінші-екінші дәрежелі травматикалық шок алғанын және көптеген сүйектері сынғанын анықтады.
Орталық қалалық клиникалық аурухананың Ортопедия бөлімі меңгерушісі Қанат Тәуекеловтің айтуынша, жан сақтау бөлімі қызметкерлері алдымен науқасты жарақат салдарынан болған шоктан арылтты. Жағдайы тұрақтанғаннан кейін екі күннен соң дәрігерлер ота жасау туралы шешім қабылдады.
"Екі кезеңмен бірнеше ота жасалды. Бірінші ота "сынған жамбас сүйегін ашық репозициялау, пластинамен және бұрандалармен бекіту" деп аталады. Науқас есін жиып, жағдайы жақсарған соң екінші ота жасалды. Бұл операция барысында сүйек тіндерін сынған жерден бір-біріне жалғап, металл конструкциялардың көмегімен жалғадық", – дейді Қанат Тәуекелов.
Мамандар сөзіне сүйенсек, жоғары технологиялардың көмегімен жасалған операция аса күрделі манипуляциялар қатарына жатады. Мұндай оталар МӘМС пакеті шеңберінде ғана жасалады.
"Біз науқасты емдеу барысында оның өмірін сақтап қалуды басты мақсат етіп қойдық, – дейді Қанат Тәуекелов. – Сонымен қатар мүгедек болып қалмауы үшін барымызды салдық. Нәтижесінде біз науқастың өмірін сақтап қана қоймай, аяққа тұрғыздық".
Науқас отадан кейін екінші күні-ақ аяққа тұрды. Орталық қалалық клиникалық ауруханада реабилитациядан өтті.
А. Жапатова