Бөлмесінде ойнап жүріп, көпқабатты үйдің терезесінен құлаған: Ақтөбеде бала мерт болды

Ақтөбеде жазатайым оқиға болды. Бес жасар бала терезеден құлап мерт болды, - деп хабарлайды Massaget.kz тілшісі.

​Бала бөлмесінде ойнап жүріп, көп қабатты үйдің жетінші қабатының терезесінен абайсызда құлап кеткен.

"Жазатайым оқиға салдарынан алған дене жарақатынан бала оқиға орнында қаза тапты. ​Өкінішке қарай, мұндай оқиға биыл облыста бірінші рет емес. Жыл басынан бері жеті жасөспірім бала терезеден құлады, салдарынан бір бала көз жұмды", - деп жазылған өңірлік ПД хабарламасында.

​Ақтөбе облысының Полиция департаменті қауіпсіздік шараларын сақтау қажет екенін еске салады:

• кішкентай балаларды ешқашан қараусыз қалдырмаңыз;
• терезенің шыбын-шіркейлерден қорғайтын торлары баланы қауіптен сақтамайтынын естен шығармаңыз
• балалардың балконға ересектерсіз кіруіне жол бермеңіз!

Аптаның басты оқиғалары мен пайдалы видеоларды көру үшін YouTube арнамызға жазылыңыз