"Боғымен жасты қыз-жігіттер өлтірді". Белгілі журналист Амангелді Сейітханға қатысты тың деректерді айтты
!["Боғымен жасты қыз-жігіттер өлтірді". Белгілі журналист Амангелді Сейітханға қатысты тың деректерді айтты](/userdata/news/news_89013/image_l.jpg)
Спорт журналисі Аслан Қаженов белгілі комментатор, марқұм Амангелді Сейітханның өміріне қатысты көпшілік біле бермейтін жәйттарды өзінің Instagram парақшасында жария етті, - деп хабарлайды Massaget.kz тілшісі Vesti.kz-ке сілтеме жасап.
"Олар әлі талай адамды жалмайды...
Жақында Қазақ радиосындағы "Бестселлер" бағдарламасына сұхбат бердім. Әңгімеміз бір кезде Амангелді Сейітханға бұрылды. Оның ішінде Аман ағаның тікелей эфирден шеттетіліп, комментатор болуына кедергілер айтыла бастады. Бұл енді көпшілікке белгілі жайт қой. Плюс өзім біліп жүрген, бірақ, көбі біле бермейтін жағдайларды да айттым.
Мәселен, 2016-2017 жылдарға дейін микрофон ұстап, бізбен бірге "поляда" жүрді. Оны қызметте өсірмеу туралы тікелей бұйрық болды. Шетелдегі спорттық шараларға баруына мүмкіндік бермеді. Амалсыз, жұмыстан уақытша шығып, федерацияға не министрлікке келісіммен жұмысқа тұрады. Сөйтіп, солардың атынан ғана барып жүргенін көрдім. Редактор болған кезінде мәтінді өзгертуге, тіпті, эфирдегі материалға тиісуге тыйым салды", - деді ол.
Ол марқұм Амангелді Сейітханның жолын кескендер туралы да жазды.
"Осы бар, өзгесі бар, барлығын жасап жатқан боғымен жасты қыз-жігіттер. Әрине, моральдық тұрғыда ауыр. Ағамыздың кемшілігі - соның бәрін ішінде сақтады. Ашық айтпады. Шерін тарқатпады. Соңында қайтыс болуына да сол түрткі деп ойлаймын. Өйткені, ковид кезінде осындай жаралардың беті ашылып, барлық ауру қозады ғой. Қысқасы, сөйтіп, Амангелді Сейітханды өлтірді. Ащылау болса да, ашығы осы ғой. Енді одан жақсы адам таппай жүрміз.
Қалай болғанда да, Амангелді өз биігінде қалды. Оның есімін де, еңбегін де көпшілік жақсы біледі. Біз тұрғанда насихаттала береді де. Ал, оның балағынан тартып, жан-жағынан жұлмалаған кімдер? Оларды ешкім білмейді. Олар әлі тірі жүр. Олар солай өмірден өтеді де. Өкініштісі, Амангелді Сейітхан сияқты талай адамды жалмап кетеді. Оларда өкініш болмайды. Олардың миссиясы сол ғана. Олардың қолынан басқа ештеңе келмейді. Радиодағы сұхбатты осындай ойлармен түйіндедім...", - деп жазды Қаженов.
Еске салайық, белгілі спорт журналисі әрі комментатор Амангелді Сейітхан 2021 жылы 16 тамызда 52 жасында коронавирустан көз жұмған еді.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
М. Лұқпан