БҚО-да пара алған шенеуніктер сотталды (Видео)

БҚО-да қалалық сәулет және қала құрылысы бөлімінің басшысы сотталды, - деп хабарлайды Massaget.kz тілшісі.

Кімдер сотталды?

Орал қаласының соты қалалық сәулет және қала құрылысы бөлімінің басшысы А.Ташенбаевқа, оның қарамағындағы бас маман Н.Ғатауға және "Алиханстройпроект" ЖШС директорының орынбасары А.Көпбаевқа үкім шығарды.

• Тәшенбаев аз қабатты көппәтерлі тұрғын үйлер салу бойынша эскиз жобаларын келіскені және сауда-саттықсыз жер учаскесін заңсыз беру жолымен лауазымдық өкілетін асыра пайдаланғаны үшін, Көпбаевтан жалпы сомасы 1,5 млн теңге пара алғаны үшін кінәлі деп танылды.
• Ғатау жер учаскесін іріктеу актісін келіскені үшін Көпбаевтан 500 мың теңге сомасында пара алғаны және мемлекеттік қызметтер порталына құрылыссыз жер учаскесін кеңейту туралы құжаттарды заңсыз енгізу жолымен лауазымдық өкілетін асыра пайдаланғаны үшін кінәлі деп танылды.

Сот үкімі

Тәшенбаев пен Ғатау 7 және 3,5 жылға, ал пара беруші 7 жылға бас бостандығынан айырылды.

Олардың барлығы өмір бойы мемлекеттік қызметте және квазимемлекеттік сектор субъектілерінде лауазымдарды атқару құқығынан айырылған.

Сот актісі заңды күшіне енген жоқ.

Еске салайық, бұған дейін Қарағанды облысында облыстық мемлекеттік кірістер департаменті басқармаларының басшылары пара алғаны үшін сотталды.

Аптаның басты оқиғалары мен пайдалы видеоларды көру үшін YouTube арнамызға жазылыңыз