Әлеуметтік желілерде "Батыс Қазақстан облысында балықтар жаппай қырылып жатыр" делінетін видео тарап кетті. Ауыл шаруашылығы министрлігінің Балық шаруашылығы комитеті желіде тараған ақпаратқа пікір білдірді, - деп хабарлайды Massaget.kz тілшісі.
Instagram-да балық аулау орындарының бірінен "Қазақстан, БҚО, Орал" деген жазуы бар видео пайда болды, кадрларда балық мұзда қатып қалғаны көрінеді.
"Қараңыздар, екі күн бұрын мұнда су болған, тірі балықтар жүрген, шортандар. Міне, қаншама балық", – дейді кадр сыртындағы дауыс.
Балық шаруашылығы комитеті мәліметінше, әлеуметтік желілерге мониторинг жүргізу барысында Жайық-Каспий су шаруашылығы бассейні инспекциясы бұл видео 14 ақпанда Telegram-да жарияланғанын және шын мәнінде Ресейдің Астрахань облысында түсірілгенін анықтаған.
"БҚО аумағындағы су айдындарындағы мұздың қалыңдығы 30-40 сантиметрге жетеді, ал видеодағы климаттық жағдай және ауа райы мүлдем өзгеше. БҚО балық инспекциясы басқармасының мамандары облыс аумағындағы су айдындарында күнделікті бақылау және қадағалау жұмыстарын жүргізіп жатыр", – деді комитет өкілі.
Аптаның басты оқиғалары мен пайдалы видеоларды көру үшін YouTube арнамызға жазылыңыз