Биыл адам саудасына байланысты 150-ден аса қылмыстық іс тіркелген

Мемлекет басшысының Ішкі істер министрлігі ұйымдасқан қылмыстық топтарды құру, оларға басшылық ету және оларды қаржыландыру бойынша 60-тан аса қылмыстық іс тіркеді. Оның ішінде трансұлттық ауқымдағы деректер де бар. Қылмыстық құрылымдардың 250-ден аса қатысушысы қылмыстық жауапкершілікке тартылды, - деп хабарлайды Massaget.kz тілшісі Polisia.kz-ке сілтеме жасап. 

"Ел аумағында шетелдік криминалитеттің ықпалына жол бермеу бойынша шаралар қабылданып жатыр. Жүргізіліп жатқан жұмыстың нәтижесінде құрамында Қазақстан адамдары да, жақын шет мемлекеттердің адамдары да бар алты трансұлттық ұйымдасқан қылмыстық топтың қызметі тоқтатылды. Бұл деректер бойынша трансұлттық қылмыстық топты ұйымдастырғаны және оған қатысқаны үшін тоғыз қылмыстық іс тіркелді. Сонымен қатар, шетелдік әріптестермен өзара іс-қимыл барысында республика аумағына төрт шетелдік қылмыстық билік өкілінің кіру деректерін дер кезінде анықтап, жолын кестік", - деп атап өтті ҚР ІІМ ұйымдасқан қылмысқа қарсы күрес департаментінің бастығы Қанат Нұрмағамбетов.

Ұйымдасқан қылмысқа қарсы күрес басқармаларының қызметкерлері жыл басынан бері заңсыз айналымнан 470 атыс және травматикалық қару, 44 граната, екі граната атқыш, 400 грамм тротил және 14 мыңнан аса оқ-дәрі тәркіледі.

Президенттің тапсырмаларын орындау шеңберінде мемлекеттік органдармен, халықаралық және үкіметтік емес ұйымдармен өзара іс-қимыл жасай отырып, "Қазақстан Республикасында адам саудасына қарсы іс-қимыл туралы" Заң жобасы әзірленді.

Ол адам саудасының алдын алу және оған қарсы күресті, сондай-ақ, субъектілердің қызметін үйлестіру жөніндегі ұйымдық-құқықтық негіздерді регламенттейді, уәкілетті органдарды айқындайды және адам саудасының құрбандарын қорғау бойынша шараларды белгілейді. Қазір заң жобасы Парламент Мәжілісінің қарауында.

"Полиция қабылдаған шаралардың нәтижесінде биыл адам саудасына байланысты 150-ден аса қылмыстық іс тіркелді, оның ішінде 28 дерек кәмелетке толмағандарға қатысты. Мәселен, қазанда "Қорғас" халықаралық орталығының аумағында сауықтыру орталығы мен қонақ үй кешенінің атын жамылып жұмыс істеген притондар мен жасырын казинолардың заңсыз қызметі тоқтатылды. Бес күдікті құрықталды, оның ішінде екеуі шетелдік", – деді Қанат Нұрмағамбетов.

Өңірлерде, әсіресе оқу орындарында бопсалау деректерін болдырмауға бағытталған жұмыстар қарқынды түрде жүргізіліп келеді. Ұйымдасқан қылмысқа қарсы күрес басқармаларының қызметкерлері бопсалаудың 470 дерегі анықтап, жолын кесті, оның ішінде 261 қылмыстық іс бойынша кінәлі адамдар жауапқа тартылды.

Бұдан басқа пайдалы қазбалар мен бағалы металдарды өндіру объектілерінде ұрлыққа жол бермеу бойынша шаралар қабылданып жатыр.

"Аймақтарда жекелеген қылмыстық топтарды анықтау және олардың әрекетінің жолын кесу бойынша жедел-іздестіру іс-шаралары тұрақты негізде жүргізіледі. Биыл тек Қарағанды облысының өзінде ықпал ету салаларын өзара бөліске салып қана қоймай, өңірдің ірі кәсіпорындарынан тауарлық-материалдық құндылықтарды ұрлаған қарсылас екі ұйымдасқан қылмыстық топқа тосқауыл қойылды. Наурыз және тамызда өткізілген екі ауқымды арнайы операцияға 500-ден аса полиция қызметкері мен Ұлттық ұланның арнайы күштерінің жауынгерлері жұмылдырылды. Екі топтың 70-ке жуық қатысушысы ұсталып, оның ішінде 30 адам қамауға алынды. 170-тен аса тінту шаралары жүргізілді, нәтижесінде 18 атыс және травматикалық қару, суық қару, үлкен көлемде қаражат, жарылғыш заттар және басқа да заттай айғақтар тәркіленді. Ұйымдасқан қылмыстық топ құрғаны, басқарғаны және оған қатысқаны үшін, сондай-ақ қару сақтау, ұрлық, бұзақылық, бопсалау, денсаулыққа ауыр зиян келтіру және кісі өлтіруге оқталу деректері бойынша бірнеше қылмыстық істер тіркелді", – деді спикер.

Елордада тапсырыспен кісі өлтірудің екі дерегі анықталып, дер кезінде тоқтатылды. Қарызды қайтармау қылмыстарға себеп болған.

"Біз басқа құқық қорғау және арнайы органдармен тығыз байланыстамыз. Мәселен, қаңтар және қазанда Ұлттық қауіпсіздік комитетімен бірлесіп, Қызылорда, Жамбыл, Түркістан және Жетісу облыстарында бұзақылыққа, ұрлыққа, бопсалауға, қаруды заңсыз сақтауға, заңсыз көші-қонды ұйымдастыруға, адамдарды ұрлауға және қаруды қолдана отырып жасалған қылмыстық қақтығыстарға қатысы бар қылмыстық топтарды ұстау бойынша арнайы операциялар жүргізілді. Сондай-ақ, Қаржы мониторингі агенттігімен де бірлескен жұмыстар жүргізіліп жатыр. Мысалы, ағымдағы жылдың ақпанда бірлескен жедел іс-шараларды өткізу кезінде заңсыз айналымнан 20 мың литрден аса контрафактілі алкоголь, 16 мың литрден аса алкоголь және 1 600 000 қорап темекі тәркіленді. Одан бөлек бірлескен іс-шаралар барысында желтоқсанда Павлодар және Абай облыстарының аумағында жалпы құны 1,5 миллиард теңге немесе 3 миллион АҚШ доллары болатын акцизсіз темекі өнімдерін тасымалдаған үш жүк көлігі анықталып, тоқтатылды. Мұндай жедел іс-шаралар Қазақстан Республикасының заңнамасына сәйкес прокуратураның үйлестіруімен жүргізіледі", – деп атап өтті департамент бастығы.

Ұйымдасқан қылмысқа қарсы күрес бөліністерінің жедел әзірлемелерінің орбитасында биоресурстарды заңсыз өндірумен айналысатын қылмыстық топтар да бар. Қыркүйекте Солтүстік Қазақстан облысының аумағында шаяндарды заңсыз аулаған адамдар тобы әшкереленді. 15 тоннадан аса шаян тәркіленді. Алдын ала болжам бойынша мемлекетке 200 миллион теңге залал келтірілді. Қазанда Батыс Қазақстан облысында бекіре тұқымдас балықтар мен уылдырықтарды заңсыз өткізу арнасы анықталды. Ұсталған топ балық өнімдерін жалған құжаттар арқылы базарларға жеткізіп отырған. Тінту кезінде 1,5 тоннадан аса бекіре балығы, шамамен 30 келі уылдырық, ақша және атыс қаруы тәркіленді. Ұйымдасқан қылмысқа қарсы күрес бойынша жұмыс ІІМ басшылығының бақылауында.

Instagram парақшамызға жазылып, ең қызықты ақпараттарды бірінші болып оқыңыз!