Бектұров Тоқаевқа Қазақстанға тартылып жатқан инвестициялар туралы айтты

Мемлекет басшысы "Астана" халықаралық қаржы орталығының басқарушысы Ренат Бектұровты қабылдады. Ол Президентке "Астана" халықаралық қаржы орталығының былтыр және биыл бес айда атқарған қызметінің нәтижесі жөнінде баяндады, - деп хабарлайды Massaget.kz тілшісі.

Ақорданың баспасөз қызметінің хабарлауынша, Ренат Бектұров Мемлекет басшысына Орталықтың 2025 жылға дейінгі даму стратегиясын іске асыру аясында шетелден инвестиция тартуға жәрдемдесу, қарқынды капитал нарығын дамыту және қаржы индустриясындағы инновацияларды ілгерілету секілді негізгі үш бағыт бойынша атқарылып жатқан жұмыстар туралы мәлімет берді.

Ренат Бектұровтың айтуынша, Қаржы орталығы құрылғалы бері Қазақстанға 8,3 миллиард доллардан астам инвестиция тартқан. Кейінгі жылдары АХҚО қатысушыларының саны қарқынды өсіп келеді. Дүниежүзінің 75 елінен 2 мыңға жуық компания бизнес жүргізу үшін АХҚО-ның юрисдикциясын таңдады. Әлемдік ірі қаржы институттары, атап айтқанда қытай банктері, араб елдерінің қаржы құрылымдары және танымал технологиялық компаниялар АХҚО базасында өкілдігін белсенді түрде ашып жатыр. Жалпы, Орталық құрылған сәттен бастап АХҚО экожүйесіне қатысушылар бюджетке 50 миллиард теңгеден астам, соның ішінде былтыр 26 миллиард теңге көлемінде салық төлеген. Қаржы орталығы құрамындағы дауларды шешу институттары (АХҚО соты және Халықаралық төрелік орталығы) бүгінге дейін 2 мыңнан астам коммерциялық және қаржылық істі қараған.

Кездесу соңында Қасым-Жомарт Тоқаев АХҚО-ны халықаралық аренада еліміздің басты инвестициялық алаңдарының бірі ретінде ілгерілету қажет екенін айтты. Сондай-ақ Мемлекет басшысы АХҚО құрамындағы биржаны, реттеушіні және басқа да институттарды әлемдік үздік стандарттар негізінде одан әрі дамыту маңызды екеніне назар аударды.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!